U Bah Thomas Passah, President jong ka KHNAM hynne ka sngi u la leit ban iakynduh ia u Bah Shemborlang Rynjah – CEM KHADC na ka bynta ka mat ba u CEM un peit bad iakren halor ka jingthung kam sop sop jong ki nongialam barim ka KHADC bad halor ka bai bylla sngi jong ki paidbah ka Jylla.
Haba iakren halor ka rukom thungkam ha ophis KHADC, u Bah Passah u la ong ba katkum ka jingwad bniah lyngba ka RTI, la lap ba ka EC barim jong ka KHADC ka la leh ia ki kam shukor khamtam ia ki samla wadkam ka Jylla ha kaba kam ju pynmih ia ki khubor (Advertisement) ne jingpyntip (Notification) halor ki kam ba lait ha ophis KHADC hynrei ka la shu thung da ki briew lajong. U la ong ruh ba lait tang ki kam Magistrate, Under Secretary bad Accountant ka ophis ka la shu wah notis hapoh KHADC katba ia kiwei ki kam kiba bun, la shu thung hi khlem da pynmih khubor ei ei.
Shuh shuh u la ong ba kane ka jingleh buhrieh jong ki nongialam ka KHADC ka la ktah ia ka iohkam iohjam ki samla ka Jylla khamtam ia kito kiba dei hok ban ioh ia ki kam namar ki kyrdan pule jong ki.
U Bah Passah u la kyntu ia u CEM ban shimkhia ha kaba iadei bad kane ka bynta bad kyntu ruh ba nangne shakhmat kin pyllait ia ki jingpyntip lyngba ki lad pathai khubor khnang ba ki samla kin ioh ia ka kabu ban iakhun ia ki exam kam kiba lait ha katei ka ophis.
Kawei pat ka mat ba u President ka KHNAM u la ioh ia ka kabu ban wanrah ha ka miej jong u CEM ka long halor ka jingsiew bai bylla sngi tang 5000 tyngka shi bnai (Casual worker) kaba dei ka jingpynkhein ia ka aiñ ba la buh (daily wages act). Halor kane ka mat, u Bah Thomas u la ai jingmut ia u CEM ba dei ban pynkylla noh ia katei ka rukom treikam bad dei ban siew da ka dor ba la buh da ka aiñ, kata ba la buh ryntih da ka Sorkar.
