Ka Committee on Environment jong ka Meghalaya Legislative Assembly hapoh ka jingpyniaid jong u ma Wailadmiki Shylla uba dei u MLA jong ka Jowai kum u Chairman, kala ioh ban shong ia ka jingialang ha Conference Room jong ka Main Assembly Building, Administrative Block, Meghalaya Legislative Assembly, ha Khyndailad, Shillong mynta ka sngi.
Ha kane ka jingialang la iadonlang ki dkhot jong ka Committee kiba kynthup ia u bah Mayralborn Syiem, MLA ka Nongpoh, u Methodius Dkhar, MLA ka Mawshynrut, u Heaving Stone Kharpran, MLA ka Mawryngkneng bad u Co-opted Member Dr. Wishming Ryngkhlem, ryngkat ki sahep na ki tnad treikam bapher, ki bor pyniaid District bad ki dkhot na ka Meghalaya Legislative Assembly Secretariat.
Ka jingthmu ba kongsan jong kane ka jingialang ka long ban peit bniah halor ka jinglong jingman jong ka mariang bad ka jinglong ka suiñbneng kumjuh ka jingshimkhia na ki tnad sorkar bapher bapher.
Na ka liang jong u Chairman ma Wailadmiki Shylla ula kdew ba kane ka jingialang ka long iarap ia ki tnad sorkar bapher bapher ha ka jingiadei bad ka jinglong jingman jong ka mariang hapoh ka jylla. U khmih lynti ba lyngkab kane ka jingialang yn sa lah ban wan rah ia ki lad jingiada ha ki por ki ban sa wan. Ka Committee ka la kut jingmut ban wan rah ka jingiada ba pura ia ka long ka man jong ka sawdong sawkun ka jylla ha ki por ban sa wan.
