Ka Krishi Vigyan Kendra (KVK) West Jaiñtia Hills, mynta ka sngi 4 tarik u Jylliew kaba dei ka sngi ba hynriew (6) jong ka prokram ‘Viksit Krishi Sankalp Abhiyan’ (VKSA) kila leit ban ai jinghikai ïaki nongrep ka District kynthup ïa ki 9 tylli ki shnong hapoh ka Thadlaskeiñ C&RD Block.
Kine ki shnong kiba kynthup ïa ka Demthring, Sohmynting, Lumkhudung, Niriang, Moodymmai neng, Moodymmai wah, Mukhla Mission, Mukhla Umlynshor bad Mukhla Shohshrieh kiba hap hapoh ka Thadlaskeiñ Block West Jaiñtia Hills bad baroh ki nongrep kiba la wan ïashim bynta ki don haduh 834 ngut.
Na ka liang ki dkhot ka KVK kiba leit ban ai jinghikai sha ki nongrep la pynbynta ha ki lai kynhun ka Team-1, Team-2 bad ka Team-3 ha ryngkat ki Scientist, ki ophisar bad ki nongtrei ka tnad ka rep ka riang.
Ha kane ka prokram, la ai jinghikai ïa ki nongrep naduh ka rukom rep ïa ki jait soh, ka rukom ai dawai ïa ki jingthung ka rukom pynïaid ïew ïa ki mar rep, ka rukom ri ïa ki jingri, nalor kiwei kiwei de kiba long katkum ka jinghikai jong ka juk stad mynta (technology).
La batai ruh shaphang ki skim bapher bapher jong ki nongrep kiba lah ban ïoh na ka sorkar kum ka PM KISAN, NMEO, State rice mission, Crop Insurance Scheme, CM- Assured Scheme, PMFME Scheme & Packaging Scheme, MOVCD-NER, MIDH, PMKSY (PDMC), Spice Development Scheme, nalor kiwei kiwei de.