Kum shi bynta ka jingrakhe Mariang ha satlad ka pyrthei ia kane ka jingrakhe Mariang hapoh ka jingialam jong u ma Cresentus Susngi MDC ka Nangbah Mihmyntdu la pynlong ha Madan thadmyntang Nangbah hapdeng ka jingiphuh iphieng da ka jingiashim bynta ki Nongkitkam shnong jong ka shnong Nangbah bad Mihmyntdu bad ki riewkhmat jong ka Constituency ha kaba u ma Cresentus Susngi MDC u long u kongsan.
U ma Susngi haba kren ha kane ka sngi u ong ka jingpynneh pynsah ia ka Mariang ka long kaba donkam ia u briew ne ka briew. Nangta u ong ka Mariang lane ka Meiramew ka long ka Nongpynkhiah ia u briew ne ka briew bad ka Mariang lane ka Meiramew kaba dap da ki Dieng, ki Siej bad ki Khlaw ba jyrngam ka pynlong ia ka Lyer ka bakhuid ba ki briew ki ringmynsiem, ka pynsboh ia ka khyndew, ka pynneh pynsah ia ki Um, ki Wah bad ka jaka rieh ia ki Sim, ki Doh, ki Mrad ki Mreng kiba par kiba her ong u ma Cresentus Susngi.
Nangta u ong ka jingshaniah jong u ne ka briew ha ka Mariang lane ka Meiramew naba ka Mariang ka ai jingkoit jingkhiah ia ka met bad ia ka mynsiem jong ki briew. U ma Susngi u ban shuh shuh da kaba ong ba U Blei u la thaw bad saiñdur ia ka Mariang kaba itynnat ba kan pynmyntoi bad ba kan shakri ia ki khun bynriew, wat la katta kumba ngi iohi mynta ki briew ki la pynjot, pynjulor ia ka Mariang, ia ki Khlaw ki btab da kaba thang ia ki Lum bad ki Them bad ban ioh biang ia ka Meimariang kaba itynnat, nga ai ha phi ia kine ki tynrai Dieng wat lada ym lah ban ai ba phin thung haduh ban da jyrngam ki Lum ki Them, hynrei to shim ia kine ki tynrai Dieng kat kiba nga lah ei ban ioh bad thung shwa ha ki Phyllaw ïing Skul jong phi ba ki khynnah skul kin ioh ia ka lyer kaba khuid bad kaba long shibynta ka Nongpynkoit pynkhiah ia u briew ne ka briew ba lyngba ka jingdon jong ki Dieng, ki Siej, ki briew ki ioh ban ringmynsiem ia ka lyer ka bakhuid pynkut u ma Cresentus Susngi haba kren ha ka jingialang hynne ka sngi (05/06/25) ha Madan-myntang thad.
Ha kane ka sngi la ioh ruh ia ka jingkren sngewnguh ia kane ka jingkitkhia jong u ma Cresentus Susngi, Local MDC jong ki ban pynioh tynrai dieng bad symbai Dohkha ban thung ha ki phyllaw ïingskul jong ki bad pynlait symbai dohkha la ioh ia ka jingkren kiba sngewtynnat da u Waheh Shnong ka Nangbah Waheh Anton Yongwai, kong Phinbha Sana Head-Misstres Mihmyntdu U.P.School, ma Shanbor Pasi Secretary Fishsing Association Nangbah bad kiwei de ki Rangbah.
Baroh ki Nongkren ki la pynthikna ba kin shim ka jingkitkhlieh ha kaba sumar ia kine ki Dieng kiba ki la thung bad kumjuh ha kaba sumar ia kine ki dohkha kiba arhajar tylli kiba la pynlait ha ka wah Myntang bad kin buh ruh da ki briew kiba kyrpang ban peitngor bad lada lap ia uno uno ne kano kano u ne ka briew kiba tongjar ne tongsasi ne ber dawai ha kine ki jaka kiba la pynlait dohkha kin shim da ka rai kaba tyngeh ia ki nongleh dusmon.
