Ka Jaintia National Council – Khliehriat Circle mynnin ka Sngi kala rakhe ïa ka Sngi Pynneh Mariang lane ka World Environment Day ha ka 5 tarik Jylliew 2025, da kawei ka jingmut kum ka jingpyrshang ban pynsngewthuh paidbah halor ka jingdonkam ban ïada bad ban sumar ïa ka mei mariang.
Ka seng hapoh ka Jingialam u President ka JNC Khliehriat Circle bah Shanborlang Bamon ha kane ka Sngi rakhe mariang katkum ka theme Jong ka ha une u snem 2025 kata “Best plastic Pollution” kala ioh ban shim bynta hakiba bun ki Liang kynthup ka jingpynkhuid ïa ki jaka paidbah kiba dap daki bilor plastic bad kiwei kiwei ki kynja plastic, ka jingsam ïa ki dustbins sha ki dong bapher bapher ka Shnong Khliehriat ban pynduna iaka jingnoh pathar khamtam iaki plastic, bad la ioh ruh iaka jingthung dieng ha ki jaka kiba la Duna palat ki dieng, kum shi bynta ban kyntiew ïa ka jingkhuid ka jingsuba Jong ka Shnong ka thaw bad iaka mei mariang hi baroh kawei.
Ka seng ka la pynkynmaw ruh ïa ka jingdonkam haka jingïatrei lang ban pynneh pynsah ïa ki jingdon jingem jong ka mariang, bad ruh ban tip ban ri ban sumar iala ka mariang kumba ka ruh kala ri la sumar iangi naka por shaka por.
“Ki wah, ki lum bad ki khlaw ki long ka spah tynrai bala ai hangi, bad ka jingkitkhlieh jong ngi ka long ba kumno ban iada ban pynneh ia ki khnang ba kan long ka jingmyntoi ia ngi hi, to kane ka sngi kan ai mynsiem ïa ngi ha kaba ngin nang ban shim khia ban ïada ïa ka mariang jong ngi,” Ong ka JNC Khliehriat Circle.
Ka seng ka pynpaw ruh ïa ka jingsngewnguh ïa ki paidbah, ki volunteer bad ki nongkyrshan kiba la shim bynta ha kane ka sngi bad ka la pynpaw ruh ïa ka jingkut jingmut ban bteng shakhmat ïa ki jingpynlong jingtip bad jingialeh lang ban pynneh ïa ka mariang ha ka rukom kaba dei bad ruh haka rukom trei hok.
Ka World Environment Day, kaba la rakhe man ka snem ha ka 5 tarik Jylliew ha kylleng ka pyrthei, ka pynkynmaw ïa ngi baroh ïa ka jingdonkam ban sumar bad ban burom ïa ka mariang. Ka jingïatreilang kum ha kane ka sngi ha ka jylla jong ngi ka long ka nuksa ban kyntiew ïa ka jingsngewthuh paidbah halor ka jingkordor jong ka mariang.