U Bah A.L. Hek MLA ka BJP hynne ka sngi haba kren sha ki lad pathai khubor u la ong ngim lah ban ong ban kynnoh ia ki nong Meghalaya ia kano kano ka jingjia. U la bynrap ngin wad ia ka daw mano ba leh ia kane ka kam kaba sniew bad kum u nongshong shnong ban leh ia kita ki kam sniew ngi pynrem jur bad ngim ailad ba kita ki jingsniew kin wan jia ha jylla Meghalaya.
Shuh shuh u la ong ki bun bha ki lad haba iadei bad ki nongwanjngohkai namar mynta na ka liang ka sorkar ka la buh ia ki Guide bad ka la don jingthmu ban buh da ki Nongap pahara bad ia kita baroh ka Meghalaya kan leh.
U la bynrap “u Riewsniew u don beit hi la ka jong ka jingthmu shimet um dei u riewsniew uba leh na ka bynta ka Meghalaya, um dei uta u riewsniew uba leh na ka bynta ka jaidbynriew Khasi Jaintia, uta ba leh u leh ia ka kam shimet jong u bad kum ki nongshong shnong jong ka Meghalaya ngi pynrem jur ia ki kam sniew”
U kyntu ia ka sorkar Meghalaya ban kem ia kum kita ki briew bad pynshitom ia kiba leh ia ka kam kaba sniew bad ym dei ban ailad ia ka kam sniew ban synshar ha ka jylla.
