Ka jingshong jingialang jong ka Regional Committee halor u pud u sam hapdeng ka jylla Assam bad Meghalaya kala ioh ban shong jingialang mynta ka sngi hapoh ka jingpyniaid jong u Symbud Myntri Rangbah ka Jylla Meghalaya u ma Sniawbhalang Dhar uba dei u Chairman, Regional Committee, kaba la pynlong ha ophis jong u Deputy Commissioner, East Jaintia Hills District, Khliehriat.
Kane ka jingshong jingialang kadei halor ka jingbud dien halor ka jingiasoi sngewthuh jingmut ne kata ka Assam Meghalaya Boundary MOU ha kaba ïadei bad u pud u sam ha ka shnong Ratacherra khamtam eh halor ka jingpynrung ia ka shnong Baikam shapoh ka jylla Meghalaya.
Ha kane ka jingïalang la don lang u Deputy Commissioner ka East Jaiñtia Hills District, u Shivansh Awasthi, IAS, ka Additional Deputy Commissioner ka East Jaiñtia Hills District, ka kong J.U. Kharpuri, u SP ka East Jaiñtia Hills District, u Giri Prasad, u Sub-Divisional Officer (Sardar), u M. Kumar, U Additional Superintendent of Police, East Jaiñtia Hills District, u S. Paslein, u BDO ka Wapung C&RD Block, u M. Kyndait, ki khlieh nongsynshar shnong jong ka Baikam, Ratachera, Malidor bad ki nongshong shnong jong ka shnong Baikam.
Haba pyntip sha ki lad pathai khubor hadien ba la wai ka jingïalang, u Deputy Chief Minister u la pynpaw ba ka jingïakynduh ka long kaba seisoh bad pyntip shuh shuh ba ka shnong Baikam ka don 37 tylli ki longïing na kine 30 tylli ki longïing ki la pynpaw ba ki kwah ban long shi bynta jong ka jylla Meghalaya. U la ong ruh ba ka jingïalang mynta ka sngi ka long kum ka rynsan kaba kongsan ïa baroh ar ka Regional Committee bad ki nongshong shnong ban ïakren ïa kane ka jingeh bad ba yn sa pynlong shen ïa ka jingïalang ba khatduh hapdeng u Deputy Commissioner, East Jaiñtia Hills District bad u DC na Cachar District, Assam ban ïakren shuh shuh halor kane ka phang shwa ban khot ïa ka jingialang ba khatduh.
Na ka liang ki ar DC na East Jaintia bad na Cachar District kin sa ai ia ki jingthoh sha ka sorkar jylla jong ki, khnang ba kin shim ia ka rai na ka liang jong kine ki ar jylla.
Haba kren shaphang ki skhim pynroi ba la ioh da ki nongshong shnong jong ka shnong Baikam, u Symbud Myntri Rangbah u la ong ba mynta ki paidbah ki ioh ia ki jingmyntoi na baroh ar ki jylla na Meghalaya bad Assam bad kumta donkam ban pynkut noh ia ka rai ba khatduh khnang ba ki paidbah kin ioh ia ka lad kaba paka tam na ki skhim sorkar.
Ha kajuh ka por, u Deputy Commissioner ka East Jaiñtia Hills District, u Shivansh Awasthi u la pyntip ba la pynlong bun tylli ki jingïalang ha ki por ba la dep, kynthup kawei bad u Deputy Commissioner ka Cachar ban ïakren ïa ka jingeh kaba dang sahteng jong ka shnong Baikam da ka jingthmu ban pynbeit noh ia kane ka jingeh.
