Ka tnad ka koit ka khiah jong ka sorkar jylla hynne ka sngi ka 6 tarik Jylliew ka la shimkhia halor ka jingkhlad noh ka longkmie kaba ar met kaba la tip kyrteng kum ka kong Pynchei Bareh 38 snem kaba la khlad noh ha MCH Hospital, Panaliar, Jowai.
Haba iadei bad katei ka jingkhlad noh ka kong Pynchie Bareh na ka liang ki nongpyniaid ka tnad ka koit ka khiah ki pynpaw ia ka jingsngewlem halor ka jingkhlad noh katei ka longkmie.
Haba kren sha ki lad pathai khubor haba iadei bad katei ka jingjia ha MCH Hospital Jowai na ka liang ka Dr. N. E. Kharsohnoh Director MCH & Family Welfare ka la ong hadien ka jingkhlad katei ka longkmie, ka tnad ka koit ka khiah ki la phah ia ki ophisar sha katei ka hospital ban tohkit kumno ka wan jia ia katei ka longkmie.
Shuh shuh ka la pyntip ba katei ka longkmie ka la leit sumar shwa ha ka Sutnga CHC bad ha ka 2 tarik ha ka por 8:10 pm la phah ban wan sha MCH Hospital Jowai hynrei katei ka longkmie ka khlem treh ban wan ka la wan pat ha ka sngi kaba bud, kata ha ka 12:45 bad la admit ia ka ha MCH Hospital Panaliar Jowai. Ha katei ka por la shem ba ka longkmie ka koit ka khiah, bad ki la sdang ban ai ia ki jingsumar.
Ha ka 4 tarik ha ka por janmeit katkum ka jingiathuh ki doctor katei ka longkmie ka la ud pang bad ki doctor katei ka hospital kila la ialam noh sha High Dependency Unit (HDU ) ban sumar ia ka. Hadien 7:15pm kiba haïing ki la kyrpad ban rah noh ia katei ka longkmie sha kawei ka hospital.
Hynrei na ka liang ki Doctor katba ki dang leh ban discharge noh ia katei ka longkmie kynsan kynsan katei ka longkmie ka la khie tlot bad hiar ka bor met, ha mar katei ka por ki Doctor ki la ai jingsumar, tangba kim lah shuh bad ha ka por 9:30 la pyntip ba ka la khlad noh.
Ha kawei pat ka liang ka Dr. W. Shangpliang ki la lap, lyngba ki kot ki sla ba ka jingiap katei ka longkmie, ka dei namar ka don ka jingpait ha ka plakhun, kaba na shadien kaba na ka liang ki Doctor kim pat lah ban pyntikna na kaei ka daw ba ka plakhun ka pait bad haduh mynta ki dang wad ia ka jingtip halor katei ka jingjia.
