Ka Krishi Vigyan Kendra (KVK) Jaiñtia Hills, mynta ka sngi 6 tarik u Jylliew kaba dei ka sngi ba phra (8) na ka prokram ‘Viksit Krishi Sankalp Abhiyan’ (VKSA) kila bteng ban leit ai jinghikai ïaki nongrep ka District kynthup ïa ki 9 tylli ki shnong hapoh ka Thadlaskeiñ C&RD Block ka WJHD bad ha Khliehriat C&RD Block jong ka EJHD.
Kine ki shnong ha Thadlaskeiñ C&RD Block ki kynthup ïa ka Ialong, Myrjai, Nangbah, Nongkhroh, Kdohkule bad Thadmusem. Katba ha Khliehriat C&RD Block ki kynthup ïaka Mulang, Rangad bad Moolamanoh, baroh ki nongrep kiba la wan ïashim bynta ki don haduh 955 ngut.
Na ka liang ki dkhot ka KVK kiba leit ban ai jinghikai sha ki nongrep la pynbynta ha ki lai kynhun ka ha ryngkat ka jingdonlang ki Scientist, ki ophisar bad ki nongtrei ka tnad ka rep ka riang.
Ha kane ka prokram, la ïa jinghikai ïa ki nongrep naduh ka rukom rep ïa ki jait soh, ka rukom ai dawai ïa ki jingthung ka rukom pynïaid ïew ïa ki mar rep, ka rukom ri ïa ki jingri, nalor kiwei kiwei de kiba long katkum ka jinghikai jong ka juk stad mynta (technology).
La batai ruh shaphang ki skim bapher bapher jong ki nongrep kiba lah ban ïoh na ka sorkar kum ka Insurance Scheme, PM KISAN, Soil Health Card, CM-Assured Scheme, PMFME Scheme & Packaging Scheme, MOVCD-NER, MIDH, PMKSY (PDMC), Packhouse Scheme, Water Harvesting Scheme, Plant Protection Scheme, nalor kiwei de skim kiba lah ban ïoh jingïarap.
