Kum shi bynta ban rakhe ia ka World Food Safety Day 2025 , ka Jaiñtia National Council (JNC) Khliehriat Circle ha ka 7 tarik Jylliew 2025 ka la leit ban jurip ia ki dukan bad ki hotel, kiba hap hapoh u pud u sam jong ka Khliehriat ban peit bniah ha kaba iadei bad ka jingkhuid jingsuba ka bam ka dih naka bynta u paidbah.
Ha kane ka jingleit khynra ka seng hapoh ka jingialam u bah Symboh Baiar Sumer General Secretary ka JNC Khliehriat Circle kala lap bad shem iaka jingleh jakhlia bad jingleh bym khuid ha ki katto katne ki dukan bad ki hotel ha Khliehriat, bad kane hi kan sa wanrah iaka jingeh kaba khraw ha ka jingkoit jingkhiah u paidbah.
Ka seng ka la buh ruh ka jingmaham ia kine ki dukan ba ki dei ban lehkhuid ia bam ka dih hashwa ba kin aiti ha u paidbah ban bam khamtam iaki khynnah skul kiba ju rung bad mih na ka por sha ka por ha kine ki dukan.
Ka jingbam kadei ka jingim u briew, te ha kane ka sngi rakhe jingkynmaw iaka sngi ka jingkoit jingkhiah ngi dei shisha ban buh hakhmat eh iaka khuid ka suba khnang ba kan nym wanrah iaki jingpang ba ha rukom kiba lah ban ktah iaka jingim u briew, namar ka koit ka khiah kadei ka spah bah haka jingim Jong u briew.
Ka seng ka buh ruh ka jingkyrpad iaka iing treikam ka Food Safety officer ban peit ia kine ki dukan ha man la ki por khnang ba kine ki dukan ruh kin nym shim sting iaka kam ha kaba iadei bad ka jingbam.
Ka seng ka buh ruh ka jingmaham ba lada kine ki dukan kim lah ban leh ia kaba donkam kata ban leh khuid khamtam ha ki jaka shet bam ka seng kan nym shong kli kti bad kan sa leh da kaba tyngeh ong ka kyrwoh na u General Secretary JNC Khliehriat Circle Bah Symboh Baiar.
