Jowai: Ka jingleh Niam ia ka shad Behdeinkhlam ka Seiñ Raij Mukhla ka la poi sha ka sngi ka ba lai mynta bad ia kane ka jingleh niam yn pynput lashai ka sngi 20/08/2021 ha ka Aitnar ka Seiñ Raij Mukhla ha Mukhla Nongrim ha ka por 2:00 pm.
Mynta ka sngi 19/08/2021 sngi Musiang ki khun samla shynrang bad kynthei ka Seiñ Raij Mukhla ki la wan rah ia u diengkhlam na ka Shnong Mukhla Umlangshor kaba long ka shong bri, bad ia une u diengkhlam la buh ia u ha madan Slot Masi, bad ynda la poi ha Madan Slot Masi ki Samla Shynrang bad Rangbah ka Seiñ Raij Mukhla hapoh ka jingialam u Pa Langdoh bad ki waheh Sankur ki la leit sha Madan Tih Khyndaw ban leit pynieng nyngkong ia u diengkhlam uba long ruh u Khnong Blai, bad hadien la pynieng sa ia u Diengkhlam ka Mukhla Nongrim ha Madan Slot Masi bad bud pat sa u Diengkhlam uba wanrah na ka shnong Mukhla Umlangshor. Ia kane ka jingleh Niam ia ka Behdienkhlam la pynlong ia ka katkum ki kyndon jong ka Sorkar Jylla lyngba ka tnad ka koit ka khiah bad kaba bud ryntih ruh ia ki SOP ka Sorkar Jylla. Ha kane ka sngi ki khun samla khynthei bad shynrang ka Seiñ Raij Mukhla ki la ia mih ha ryngkat bad ki Riam Tynrai tang ia kito kiba ka Seiñ Raij Mukhla ka ladep ban jied kyrpang ia ki ban ioh ban ia shim bynta.
Kumta kumba ju leh shi sien shi snem te hadien ba la dep ban pynieng ia kine ki 3 tylli ki Diengkhlam la pynlong biang ia ka Dorbar Niam bad la pyniaid ia ka da u Pa Langdoh bad ha ryngkat ki Waheh Sankur ban ia kren ia pynbeit ia ki kam ki jam na ka bynta ka Behdeinkhlam ha ka sngi Muchai kaba dei ruh ka sngi pynkut ia kane ka jingleh Niam Behdeinkhlam. Kane ka long kat kum ka jing pyllait khubor u Rgh, Standbyme Sari u ba long ruh u wei na ki Waheh Sankur na ka Kur Sari.
