U Thomas A Sangma Lamphang jong ka Meghalaya Assembly u la lum ia ka jingialang ha ka jingiadon ryngkat u Myntri Rangbah ka jylla Conrad K. Sangma, Symbud Myntri Rangbah Bah Prestone Tynsong ki ophisar, kontraktor bad kiwei kiwei ki briew kiba don bynta na ka bynta ka jingtrei ia ka Building thymmai jong ka Meghalaya Assembly.
Ha kane ka jingialang ban khmih thymmai ia ki jingdonkam na ka bynta katei ka Projek, u Lamphang u la ong ba ka kam ka iaid sted bha mynta bad ban kham pynsted shuh shuh, la buh haduh 3 bynta (shift) ki nongtrei kiba katkum ki por ba la mang khnang ba ka kam kan ym don jingsangeh.
U Sangma u la ong ruh ba ka bynta ba shapoh lah sdang mynta bad kan shimpor haduh 6-8 bnai ban pyndep pura.
“Ngi la shim katto katne ki synjam ban pyntikna ba ka jingtrei ka la dep hapoh ka por ba la dep ban buh hynrei ha kajuh ka por ngim kwah pat ban shu leh kyrkieh ia kitei kiei baroh”.
Shuh shuh u Lamphang u la iathuh ba kane ka Assembly ba thymmai ka long kaba kham bun jnit jnat bha bad kiei kiei ba yn leh thymmai kim lah ban long thurmur shuh. Ban pynbha ia ka kam, u la ong ba ka tnad ba dei khmih ia kane ka bynta ka la ïit katto katne ki ‘riew donsap bad ki briew kiba la don jingtip bha ha kane ka bynta ban pynbha ia ka jingpynwit jong ki sur ba wan na shabar, ki kor ban shai khlem shah pynwit ha ki por ba don jingkren, ka jingpyntikna ban ioh ia ka jingshngaiñ bad kiwei.