Ka Awaken India Movement (AIM) Meghalaya State, kaba dei ka kynhun treimon sngewbha ha ka kyrdan jong ka ri, ka la pynmih ia ka khubor sngewlem hadien ka jingshah pyniap ba sngewsih jong u Raja Raghuvanshi hadien ba u la dep shongkurim. Kane ka jingjia ka la wan jia hapoh ka Jylla Meghalaya hapoh ka thaiñ Sohra kaba la pynkyndit ia ka jylla bad ka jaitbynriew baroh kawei. Ka kynhun ka la pynpaw ia ka jingsngewlem sha ka iing ka sem jong u Raja Raghuvanshi da jingsngewsih halor katei ka jingjia. Kumba la tip paidbah ynda hadien ba dep ban iathoh shongkurim U Raja bad ka Sonam Raghuvanshi ki la wan kum ki nongjngohkai pyrthei shapoh ka Jylla Meghalaya ban pyndep halor ka honeymoon napoh ka Jylla Madhya Pradesh bad hadien tang katto katne por ba la poi hapoh ka thaiñ Sohra ki la jah rngai bad la pynlong paidbah napoh ka Thaiñ lem bad ki bor khmih bniah ban wat ia ki haduh ban da lap. Ynda la lap ia ka met iap jong u Raja Raghuvanshi bad hadien katto katne sngi la lap ia ka Sonam kaba dang im napoh kawei ka Dhaba kaba don hapoh Uttar Pradesh lyngba ki bor Pulit. Kumba la sakhi lyngba ki News bapher bapher halor kane ka jingjia ha kaba ïadei bad ka jingshah pynïap u Raja la tip pura kumba la paw ba la pynbeit da ka tnga jong u ka Sonam bad u kurim jongka na shadien uba la tip kyrteng u Raj Kushwaha lem bad ki laingut kiba la shimti ia ka kam ban pyndep kumba la paw kyrteng u Akash Rajput, u Vishal Chauhan bad u Anand Kurmi.
U Bah Banshai Marbaniang, u la ioh ruh ban pynpaw ka jingiaroh lyngba u Sir Dalton P Marak, uba long u IGP jongka Police Department hapoh ka Jylla Meghalaya halor ka jinglah ban shimkhia da kaba treikam kloi khlem da pynslem lyngba ka Police Investigation kaba dei ban tih bniah halor katei ka jingjia haduh ban da ioh ia ki sakhi sabut kiba skhem khlem da jah burom shuh ka Jylla Meghalaya.
Khlem da pynslem halor kumno ban ioh ia ka jingiada kaba pura, ka kynhun AIM jongka Jylla ka la hap ban pynmih ia ka jingkhot kaba tyngeh na ka bynta ka Sorkar Jylla ba kum ki nongshong shnong kiba sngewkhia, lyngba ka Sorkar ka dei ban pynbna ia ki lad ki lynti kiba thymmai ki ban wanrah ka jingshong suk hapoh ka Jylla lem ka jingsngew shngaiñ ia ki nongjngohkai pyrthei kiba wan na shabar ka jylla jongka Meghalaya, khlem da donkam ban sngew halor ka jingjia kaba dang shen kumba la tip paidbah barohlang kumjuh, kynthup ia ka mukotduma ha kaba iadei bad ka Sonam bad u Raja Raghuvanshi.
Ka AIM ka la pynbna ruh ba yn nym dei ban shah shuh ia ki nongjngohkai pyrthei ban rung khlem ka registration pass kaba biang, da kaba ban jur ia ka jingdonkam ban buddien bad pynbeit ryntih ia ka leit ka wan jongki nongwan jngohkai hapoh ka jylla Meghalaya. Kane ka sienjam ka long hadien ka jingsngewkhia kaba jur halor ka jingshngain bad ka jingpynneh pynsah ia ki riti dustur jong ka Jaidbynriew, ha kaba ki nongialam jongka AIM ki dawa na ka sorkar jylla ban pynbha bad pyntreikam kyrkieh ia ka polisi pynrung kyrteng ia ki nongjngohkai pyrthei kumba ngi sakhi ba nakaliang jongka kynhun myntri jong ka sorkar jylla Meghalaya ka la dep ban kdew ia ki jingthmu ban pynkhlain ia ka ain kaba la tip kum ka Meghalaya Residents Safety and Security Act (MRSSA), kaba thmu ban khang ia ki jingduna kiba la don lypa bad ban pynthikna ia ka jingpeitngor kaba kham bha ia ki nongjngohkai pyrthei.
U Bah Banshai Marbaniang uba long u Nongialam jongka kynhun AIM Meghalaya, u la kyntu jur ia ka sorkar jylla ban pyntreikam noh ia ka Meghalaya Integrated Transport Services (MITS) khnang ban kyntiew ia ka rukom kit passenger lyngba ki kali bapher bapher, lem kumjuh halor kumno ban dang pynhiar halor ka jingdheng kali (Traffic Congestions) bad ruh ban dang plie ia ki lad ioh kam ioh jam hapoh ka kam jngohkai pyrthei hapdeng manla ka sngi. Ka AIM ka ngeit ba ka jingpynbiang ia ki lad leit jingleit kiba kham bha kan ym ai jingmyntoi tang ia ki nongjngohkai pyrthei hynrei kan kyntiew ruh ia ka jingpynroi ia ka kam jngohkai pyrthei kaba pynshong nongrim ha ka imlang sahlang.
U Bah Banshai u la pynpaw ruh ba dei ban pyntreikam noh mardor ia ka Inter State Bus Terminal (ISBT) kaba don hapoh Mawiong surok By-Pass naka bynta ban dang kyntiew shuh shuh halor kumno ban wanrah ia ka Tourism Development kumjuh ban dang pynduna ia ki Tourist vehicles kiba wan nabar Jylla kiba rung bad mih katba mon da kaba poi ruh shaduh ki thaiñ Sohra ne Mawsynram bad kylleng sawdong jongka Jylla manla ka sngi khlem da don ba tip pura iaki. Ka AIM ka pynpaw ba ki kali jngohkai pyrthei kiba nabar jongka Jylla Meghalaya ki dei ban sangeh noh hapoh ISBT da kaba pynhiar ia ki passenger kiba wan nabar Jylla bad ban ailad ia ki kali jngohkai pyrthei kiba na la ka jong ka Jylla ban pyniaid ia ka jingleit jingwan shakhmat hapdeng manla ka sngi. Kane, ka long kawei hapdeng ki lad ban kyntiew bad kyrshan ia ki nongseng kam seng jam trai ri kiba buh ia ki Local/Tourist Taxi bad kan pynbha ia ka jingsngew jong ki nongjngohkai pyrthei baroh kawei ba ki ioh ruh ryngkatlang ia ki Nongialam lynti ban kdew pura (Tourist Guide) hapdeng ka jaka ba ki sngewtynnad ban leit khmih.
Shuh shuh, ka AIM ka la kyrpad ia ki Autonomous District Council (ADC) lyngba ka Executive Committee kaba thymmai, ba kin wanrah ia ki mat treikam halor kumno ban aibor ia ki Khlieh Nongsynshar Hima lane ki Rangbah Shnong ha ka thaiñ bapher bapher ban iada ia ki riti dustur bad ka riti tynrai jongka Jaidbynriew ritpaid hapoh ka Jylla. Ka AIM ka pynksan ba katba nang kiew ki nongjngohkai pyrthei, ka jingsumar ia ka pateng ba kyrpang jong ka ri bad ka jaidbynriew hapoh la kajong ka Jylla ka long kaba donkam haduh katta namar ka pateng kaban dang ia tyllun na kapor sha ka por.
Ka sorkar jylla, ka dei ban pynpaw ia ka jingkyrmen shaphang ka lawei jong ka kam jngohkai pyrthei hapoh Meghalaya, da kaba pynbha ia ki jingtei bad ki jingthmu thymmai kiban dang iaid shakhmat ban pyndap ia ka jingwan tuid hapdeng ki kam jngohkai pyrthei manla ka sngi. Nakaliang jongka kynhun AIM ka buh ia ki jingdawa ban pynpaw ia ka jingdonkam kaba jur ia ki jingpynkylla kiba bniah bad ruh ban pynthikna ba ka jingroi jongka kam jngohkai pyrthei hapoh ka Jylla kadei banlong kaba neh skhem ha kaban kyntiew ia ki khun samla kum ka lad iohkam iohjam bad ban dang burom ia ki nongshong shnong lem kumjuh bad ki riti dustur jong ka Jaidbynriew kaban dang iai im pateng la pateng junom.