Mynta ka sngi u Waheh Shnong jong ka shnong Lumbangla, Elaka Nongkhlieh, East Jaiñtia Hills District, u ma H.Lyngdoh u la buh jingujor sha u Superintendent of Police East Jaiñtia Hills halor ki ejahar ba la dep buh ha Saipung Police Station bad ha Khliehriat Police Station, halor ka jingshah shoh pynmynsaw u Secretary Shnong bad ka jingshah byrngem jong ki dkhot jong ka Dorbar Shnong Lumbangla.
Katkum kane ka ejahar la pynpaw ba ia kane ka kam shoh briew bad byrngem la leh da ki saw ngut ki briew tang na ka daw ba ka Dorbar Shnong ka pyndam noh ïa ka syrnot No Objebtion Cerificate ban shna karkhana Coke kaba la dep ai jingbit da u Waheh Shnong ba rim, u ma Nilan Paslein.
Ha ka shithi ujor ba la phah sha u Superintendent of Police East Jaintia Hills District, u Waheh Shnong Lumbangla, u ma H.Lyngdoh, u la pynpaw ba ki saw ngut ki briew kiba la tip kyrteng kum u bah Syrpai Sukhlain, uba na shnong Thymme Nongkhlieh, u bah Ebor Sukhlain, uba na Moolasngi, u bah Tre Sukhlain, uba na Moolashngi bad u bah Pynshngain Sukhlain, uba na shnong Khaidong, ha ka 2 tarik mynta u bnai kyllalyngkot ha ka por 7:45 myn miet ki la wan rung sha shnong da ka kali Gypsy rong lieh kaba don u number ML-04-9390 bad kila shoh la dat da ki tiar pynmynsaw bad byrngem ïa ki dkhot shnong.
Ha kane ka jingjia u Secretary shnong Lumbangla, u bah Niwan Langchiang, u la mynsaw jur bad la pynkit noh ïa u mar mar sha hospital katba kiwei pat ki dkhot shnong ki la lait pet da ka said ha kaba ki la phet krad sha khlaw, halor kane ka jingjia ka Dorbar Shnong Lumbangla myn ha ka 4 tarik mynta u bnai ka la ujor da ka ejahar ha Saipung Police Station bad ha kajuh ka por la ujor ruh ha Khliehriat Police Station bad la pynngat hapoh ki kyndon aiñ 506/323 IPC.
Ka Dorbar Shnong Lumbangla, ka pynpaw ka jingsngew lyngngoh bad watla ïa ki ejahar la dep buh naduh u bnai Nohprah pyrshah ïa kitei ki saw ngut kiba la donkti ban wan thaw kulmar hapoh shnong pohthaw, hynrei ki bor ka aiñ kim shym la kem ïa ki haduh mynta ruh.
Kumta na ka liang ka Dorbar Shnong ka ban jur ïa u Superintendent of Police East Jaintia Hills District ba un shim khia ïa kane ka kam kaba dei ka kam iap kam im bad ong ruh ba lada ka tnat pulit kam shim khia ka Dorbar Shnong kam banse ban shim noh da kawei pat ka synjam ban ujor noh sha kibor kiba halor khnang ban iada ïa ki dkhot shnong bad ïa ki nongshong shnong.