Ki MDC ka liang pyrshah hapoh ka jingïalam u ma A.A Shullai (LO) na ka seng VPP, mynta ka sngi kila pynpaw ka jingpyrshah jur halor ka jingbym ïaid beit ka EC thymmai ïa ka rukom siew tulop thymmai sha ki nongtrei ka Council kynthup ïa ki MDC.
Shuh shuh ula ong katkum ka office order na ka tnad Finance ka EC thymmai kala pynmih ïa ka order haka 10 tarik mynta u bnai ban pyllait ïa ka tulop bad ka Allowances sha baroh ki MDC ba dang shah jied thymmai bad kumjuh ïa ki ophisar bad ki nongtrei ka Council.
U ma Shullai ha ka jingkren sha ki lad pathai khubor ula ong kaba phylla mynta ha kane ka order ba thymmai la dep ban siew tulop thymmai tang na ka bynta ar bnai jong u March bad April 2025, da kaba ong balei kim long kiba ïaishah ban pyndep shwa ïa ka tulop kaba rim kaba dang sah naduh u snem 2024, hynrei kine ki MDC thymmai kiba don ha ka liang synshar kila pynbor ban siew shwa da ka tulop thymmai da kaba ieh ïa ki bnai ba dangsah shadien, ong u ma Shullai.
Halor kane ka rukom treikam jong ka Council, na ka liang ki MDC ka liang pyrshah kiba dei naka VPP, kila pyrshah jur ïa kane ka jingleh kaba lah ruh ban pynkylla ïa ka rukom treikam ka Council naduh ki por mynshwa, da kaba ong kane ka lah ruh ban ïalam bakla ïaka Council hi baroh kawei. Kumta na ka liang jong ki, ki pyrshah jur ïa kane ka jingleh namar ba kim ïaid katkum ki kyndon (rules) jong ka Council.
