Ka program kaba 15 sngi ne ka IEC campaign jong ka Dharti Aaba Janjatiya Gram Utkarsh Abhiyan (DAJGUA) kaba dei ka jingïasyllok ha ka ri baroh kawei, ka la sdang mynta ka sngi ha East Jaintia Hills District, kaba kynthup ïa ki shnong bapher bapher kiba hap hapoh lai tylli ki Block kiba kynthup ia ka Wapung, Saipung bad Lumshnong C&RD.
La pynlong ïa ki Awareness Camp ha phra tylli ki shnong, kata ha Tuber-Shohshrieh, Wapung, Iongkaluh, Bataw, Latyrke, Lamyrsiang, Chiehruphi bad Nongsning. Kane ka jingpynsngewthuh paidbah kan bteng haduh ka 30 tarik Jylliew bad kan kynthup haduh 73 tylli ki shnong, ha ryngkat ka jingïashim bynta jong ki tnat sorkar kum ka Tnat ka Koit ka Khiah, Social Welfare, Education, PWD, Agriculture, MeECL bad kiwei kiwei.
Ki jingshakri ba kongsan ki kynthup ïa ka Aadhaar enrolment, Ayushman Bharat registration, PM-KISAN enrolment, Jan Dhan account opening bad ka linkage jong ka MHIS bad Aadhaar. La pyndonkam ruh da ki kot jingtip (IEC materials) bad ki banner ban pynsngewthuh paidbah halor ki skim sorkar kiba ïa dei bad ka pule puthi, ka koit ka khiah, ka shong shngaiñ bad ka imlang sahlang.
Kane ka jingpynsngewthuh paidbah ka long ruh ban kyntiew ïa ka roi ka par (inclusive development) bad ka kyntiew ïa ki jaitbynriew trai shnong (tribal empowerment), kum shi bynta ban kynmaw burom ïa ka dap 150 snem jong ka sngi kha u Bhagwan Birsa Munda hapoh ka Janjatiya Gaurav Varsh. Ki awareness camp na ka bynta ka 19 tarik Jylliew kin sa long ha ki shnong bapher bapher hapoh kitei ki lai tylli ki Block.
