Hadien ba la ioh jinghikai na ka jingshah pyniap u Raja Raghuvanshi ha Sohra, ka Sorkar Jylla lyngba ka Tnad Tourism ka la pyntikna ban buh noh da ki kor ‘Closed-Circuit Television’ (CCTV) ha ki jaka jngohkai pyrthei (khamtam ha Sohra) bad ba baroh ki ïing basa/ïing wai (Hotel/Guest House/Resort) ki donkam beit ban leh (Compulsory), kata ban shim kyrteng ia ki nongwansah lyngba u App ‘Meghalaya Tourism’ ia kaba ka Tnad ka la dep ban pyllait.
U Myntri ba khmih ia ka tnad jngohkai pyrthei ka Jylla, Bah Paul Lyngdoh u la ong ba ia ki CCTV yn buh ruh ha ki jaka ba jur ka jingkhapngiah kali bad yn shim jingmut kham bun na ki nongshong shnong ha kaba iadei bad ka jingbuh ia kitei ki kor.
U Bah Paul u la iathuh ba haduh mynta ki don haduh 60% kiba la pyndonkam ia utei u App bad nangne shakhmat lada lap ba kino kino ki ïing basa ki bym bthah ia ki nongwan jngohkai pyrthei ban pynrung kyrteng ialade lyngba u tei u App, ka Sorkar lyngba ki Pulit kan pynshitom ia kino kino ki trai ba ai ïing basa namar lyngba utei u App ki bor Pulit ki lah ban ioh jingkheiñ thik pa thik ia baroh ki nongjngohkai pyrthei ba wan ha kane ka Jylla.
Shuh shuh u Mynri u la pynkynmaw ba la khang ban kamai ia ki kali/bike/scooty shimet, nalor kata ban khmih biang ia ka Meghalaya Resident Safety and Security Act (MRSSA) na ka bynta ka jingiakhun ia ka kam sniew bad ka jingrung pathar hapoh ka Jylla.
U Bah Paul u la ong ba ka kam jngohkai pyrthei ka kiew bha ha ka Jylla bad ban pynsuk ia ki bor pulit, ban pynmyntoi ia ki samla wad kam bad ban iarap kham bha ia ki nongjngohkai pyrthei, ka Tnad Tourism ha u Naitung kan sa pyllait kumba 50 tylli ki kali “PRIME” kiba dei ki kali na ka bynta ki nongjngohkai pyrthei bad ia kane yn sa pyllait paidbah sha ki katto katne ki briew kiba treikam lajong lyngba ka Skhim CM Elevate.
Wat la bun ki jingshah kynthoh bad ki jingkdew kti halor ka jingjia kaba dang shen ha Sohra, u Myntri u khmih lynti ba ka jinglehkmen “Cherry Blossom” ha ka jylla kan iaid beit.
