Ka Federation of Khasi Jaiñtia & Garo People (FKJGP) Jaiñtia Hills Zone hynnin ka sngi kala leit ban ïa kynduh ïa u Chief Engineer ka Public Work Department (Roads), Shillong Meghalaya, ban dawa pynshna ïa ki jingker (quardrails/safety barriers) ha baroh ki bynta ba long riat u surok kiba don hapoh Jaiñtia Hills.
Kumban shuh pynkynmaw dang ha une u bnai bala dep ka seng kala ïoh ban leit ïa kynduh ïa u Superintendent Engineer Jowai Circle PWD Roads, na ka bynta kane ka jingdawa ba donkam, hynrei na ka liang ka seng kam pat ïohi ïa kino kino ki jingpynkhreh ban pyntrei ïa kitei ki jingker ban ïada na ki jingjia ba sngewsih.
Kumta na ka liang ka seng kala leit ban ïa kynduh noh ïa u Chief Engineer PWD hapoh ka jingïalam u Chief Organizing Secretary ma Wompher Wann bad u Legal Secretary ma Lidar Paia Dkhar, kiba la kyrpad jur na utei u sahep ba un shimkhia mardor ïa kane ka kam.
Na ka liang jong u ruh ula kular ban phah ïa kane ka jingthoh sha baroh ki Executive Engineer ba kin ïoh leh ïa kaba donkam, khnang ban shngaiñ ka leit ka wan jong ki paidbah.
