Ha ka jingkhynra kaba jur ïa ka jingkhaïi drok beaiñ, ki ophisar jong ka Customs Preventive, North Eastern Region (NER) ki la lah ban khanglad ïa lai tylli ki jingpyrshang ban khaïi tuh, da kaba ioh kurup shibun ki dawai Methamphetamine bad Heroin ha ka dor kaba la antad ba ka long T. 30.17 Klur. Kine ki jingkhynra ki pyni ia ka jingshimkhia jong ka tnad Customs ban ialeh pyrshah ia ka jingma jong ka jingshalan tuh ia u drok bad ban iada ia ka ri na ki jingdih pynbuaid ba beain.
Ha ka 18 tarik Jylliew 2025, ki ophisar ka CPF, Silchar ha ka jingkhynra lang bad ki shipai BSF ki la bat ia kawei ka kali Mahindra Bolero kaba la iehnoh ha Panibhora ha ka surok Mizoram–Silchar. Na katei ka kali, la ioh kurup 79 tylli ki synduk sabon kiba don 885.56 gram u heroin bad 15 tylli ki synduk kiba don 15 kg ki dawai methamphetamine na ka thliew ba la shna hapoh ka jaka shong jong katei ka kali. Ka jingioh kurup baroh ka long T.22.15 klur. Ka jingtohkit kaba kham bniah ka dang iaid shakhmat.
Katkum ka jingioh jingtip ba kyrpang, ki ophisar jong ka CPF, Teliamura, Agartala, ryngkat bad ki shipai jong ka 28 Bn, Assam Rifles, ki la bat ia uwei u briew uba shong ha ka kali ar shaka (Bajaj 200 NS), hajan ka surok Bachaibari, Kamalpur-Khowai ha ka por kumba 21:30 shiteng synia ha ka 18.06.2025. Ha ka jingwad bniah, la lap ba une u nongniah u la kit haduh 4 tylli ki song kiba heh kiba don 4.00 kgs ki dawai rong saw lam pink (ba la suba ba ki dei ki dawai Methamphetamine). La suba ba kine ki mar ki dei kiba la wanrah na Myanmar lyngba ka Mizoram ban pynpoi ha Agartala. Ka jingioh kurup baroh ka long T. 4.02 Klur. La kem ia uwei u briew ha kane ka jingjia.
Ha ka 18.06.2025, ki ophisar jong ka Custom jong ka Singerbil CPF, Agartala ki la ioh ban kurup ia kawei ka mar kaba la suba ba kidei ki dawai Amphetamine (Yaba) Tablet baroh ba khia haduh 4 Kg, kaba dang kit na Khowai sha Vijaynagar da arngut ki briew kiba shong da ka bike pulsar rong iong ka bym don registration number. Ki ophisar ki la bud ia kane ka bike kumba 30 minit eiei lyngba ki jaka ba sanium shuwa ban ioh kurup. La suba ba kitei ki dawai, ki dei kiba la shalan beain lyngba khappud Mizoram-Tripura bad kiba dei ban pynpoi hajan Agartala.
Ka Custom ka dang ïai bteng ban ïakhun pyrshah ïa baroh ki jait kam beaiñ kiba ïadei bad ka jingshalan tuh ïa ki drok bad ki dawai pynbuaid, ka Ksiar, Sikret, ki mar kiba iadei bad ki mrad khlaw, ki pisa India ba shna thok, ki kam thok ban wanrah bad shalan mar nabar ri bad ka jingpyniaid pisa beaiñ da kaba pynshong nongrim ha ka khaïi pateng. Ka Custom ka iatreilang bad kiwei pat ki tnad bapher bapher ba pyntreikam ia ka aiñ.
Uno uno u lah ban kyrshan ia ka jingiakhun pyrshah ia ki kam beaiñ ha ki thaiñ khappud, ka jingkhaïi beaiñ bad ka jingkhaii pisa da kaba ai jingtip sha ki Custom. Ia ki kyrteng jong ki nongpyntip ym tangba la buh rieh, hynrei ka don ka skhim ai khusnam kaba heh ruh, kaba khlem donkam siew khajna.
