Ka Central Bureau of Communication (CBC), Shillong, Tnad Information & Broadcasting, Sorkar India, ha ka jingiatreilang bad ka Ramakrishna Mission, Shillong, ki la rakhe ia ka International Day of Yoga (IDY) 2025 da ka jingleh yoga kaba kyrpang, kum shi bynta ka Yoga Sangam, kaba la pynlong ha phyllaw jong ka Mission’s ha Laitumkhrah.
Ia kane ka jingïalang la plie ha ka jingiadonlang u Swami Hitakamananda ji Maharaj uba dei u Secretary jong ka Ramakrishna Mission, Shillong, u Swami Divyaswarupananda ji Maharaj, u Swami Vedeshananda ji Maharaj, bad kiwei pat ki riewkhuid ba don burom jong ka Mission.
U Swami Vedeshananda u la pynpaw ruh ïa ka jingthmu kaba don ha lyndet jong ka International Yoga Day, kaba la tyrwa da u Myntri Rangbahduh ka ri u Narendra Modi ha u snem 2014 bad kaba la kyrshan da 175 tylli ki ri. U la pynkynmaw biang ba ka yoga kam khein ia ka jinglong niam ne kolshor, ka shakri kum ka lynti sha ka bha ka miat jong ka pyrthei baroh kawei, ka jingsuk hapoh, bad ka jingkoit jingkhiah ha ka met. U la kyntu ia baroh ban pdiang ia ka yoga khlem da khein ia ka rta ne ka tynrai, da kaba ban jur ia ka jingdonkam jong ki rukom pynhiar mynsiem bad ka rukom ieng kaba biang ha kaba ioh ia baroh ki jingmyntoi jong ka jingleh yoga.
U Swami Hitakamananda ji Maharaj u la ong ba ka yoga ka dei ka jingai sngewbha ba shirta jong ka India sha ki briew- kaba ai ka lad ban ioh ia ka jingkhlain ka met, ka jingshai jong ka jingmut jingpyrkhat, bad ka jingroi ba kynja mynsiem. U la pynshlur ruh ban leh yoga man ka por ban pynneh ia ka jingiatylli hapdeng ki jingeh jong ka jingim mynta.
Kane ka jingrakhe ka dei shi bynta jong ka sienjam ‘Yoga Sangam’ ha ka ri baroh kawei, kaba kyntiew ïa ki jingpyni yoga ba ïatylli ha kylleng ka ri. Ka jingïashim bynta paidbah kaba bun ka pynpaw ïa ka jingsngewthuh bad jingaiti kaba nangroi ha ka koit ka khiah bad ka jingpyrkhat lyngba ka yoga.
Ha kane ka sngi, la rakhe ruh ha kylleng ki Jylla jong ka Ri ha kaba u Myntri Rangbah Duh Narendra Modi ruh u la ioh ia ka kabu ban ialam ia kane ka sngi ryngkat bad ki katto katne ki Nongïalam Sorkar.
