Ka seng Jaiñtia Women Awakening Movement (JWAM) kawei na ki seng longkmie na ri lum Jaiñtia kala leit ban kner ïa ki kti jong ka jingïarap sha ki lai tylli ki longïing kiba don ha ka shnong Sahsniang – B ha ka 12.4.2025, ha Mihmyntdu Wahchnong ha ka 16.6.2025 bad ha Khanduli ha ka 21.6.2025
Ka longïing kaba don ha ka shnong Khanduli (kaba ka seng kam kwah ban pynpaw kyrteng) ka dei kaba shem lanot bha namar ba ka kmie jong kane ka ïing ka dei kaba don jingpang stroke la kumba ar snem ei ei bad u kurim jong ka ruh u la phet noh bad ka don saw ngut ki khun kiba dang rit. U khun jong ka uba dang khad-ar snem u ka rta u hap ban leit trei man ka sngi ban bsa ïa ka ïing ka sem. Ka seng kala ïoh ban ïarap da ki marbam mar dih.
Ka longïing kaba don ha ka shnong Sahsniang pat kadei ka longïing kaba mat ïa ka jingjia ba sngewsih ha kaba ka ding kala bam duh ïa ka ïing jong ki bad ka wei ka khun kynthei jong ki kaba don saw snem antad ka rta bad duh lut ïa ki jingdon jingem jong ki baroh. Ia kane ruh ka seng ka ïoh ban synniang da ka song pisa.
Ka longïing ha Mihmyntdu pat ki dei ki khun swet kiba iasah lang bad u kpa jong ki. Hynrei une u kpa jong ki u don hapdeng ka jingpang jingshitom la kumba hynriew hynñiew snem ei ei bad um lah shuh ban trei ban ktah. Ia kine ruh ka seng ka la ïarap daka song pisa hi.
Haba ka seng ka phah ïakane ka kyrwoh kam mut baka kwah ban ioh jingïaroh ne kwah burom kwah nam, hynrei kum ka jingpyntip khnang ba ki wei pat ki paralok kiba don mynsiem ban ïarap ruh kin ïoh ban ïarap lang la pynpaw ki nongialam.
Ia kane ka kyrwoh khubor la phah da i Kong R. Shylla – President bad Secretary Kong , R. Siangshai jong ka seng JWAM.
