Kum ban shu pynkynmaw ba ha ka 16 tarik u bnai Jymmang 2025, u Bah Reachingson Siangshai u la dep ban buh da ka RTI ha ka office u DC ka EJHD ban ïoh ïa ka jubab ha ka jingiadei bad ka rukom thep kam thep jam hapoh kane ka district lyngba ka DSC (District Selection Commitee). Kane ka jingwan ban buh RTI une u Rangbah ka long hadien ba ki nongthep kam ki la wan ban ud sha u ba na ka liang ka jong ki, ki ong ba kim shai ha ka rukom thep kam thep jam hapoh kane ka District.
Mynta ka sngi ka 25 tarik u bnai Jylliew 2025 pat u bah Reachingson Siangshai u la ïoh ïa ka jubab na ka office u DC ka EJHD bad kane ka jingïoh jubab ka jong u kam pat pynhun ia u katkum kita ki jingkylli kiba na ka liang ka jong u, u la buh.
Haba u Bah Reachingson u la kren sha ki lad pathai khubor u la ong ruh ba ia ka post jong ka Sectional Assistant ha ka por ba ki pynmih ia ka advertisement ka don tang ar tylli hynrei haba paw pat ha ka result ki don kumba lai ngut kiba ioh ha kane ka juh hi post.
Shuh shuh ha ka jubab lyngba ka RTI u Bah Reachingson u ong ba ki nong apply lane kita ki nongthep kam ha ki post kiba hap hapoh ka grade 3 ki post ki don haduh 38 tylli katba ki nongthep kam pat ki don haduh 12,400 ngut katba ha ka grade 4 pat ki post ki lait haduh 30 tylli katba ki nongthep kam pat ki don haduh 12,782 ngut.
Na ka liang u Bah Reachingson u ong ïa ki jubab kiba u la ïoh mynta ka sngi un sa shong bishar bad peit bniah bha ïa ki bad lada u donkam ban ïaid shakhmat da kawei pat ka sienjam un sa pyrkhat da kano ka lad tad haduh ba un da ïoh ïa ka jingshai kaba pura.
