Ka Synjuk ki Waheh Shnong Ri Jaiñtia ha ryngkat ki kynhun Sengbhalang kynthup ïaka KSU, FKJGP, JSU, JSM bad kiwei de hapoh ka lama ‘Jaiñtia Border Area Committee’ mynta ka sngi Palei kila leit ïakynduh ïaka ADC jong ka West Jaiñtia Hills ka kong B. Blah ban dawa naka Sorkar ban buh noh da ka Temporary Out-post ha Lapangap WJHD ha ki bynta ka jaka ba ka Assam ka wan ban thung dieng kaba la tip kum ka ‘Lum Umchyrngan’.
Katkum katei ka dorkhas bala dep aiti kila pynpaw ka jingsngewdiaw halor ka jingbteng jong ka jingïakhajia khappud kaba man ka por, hapdeng ki jait bynriew Karbi (Assam) bad ki Khasi Pnar (Meghalaya) kumba la jia hynnin ka sngi 25 tarik u Jylleiw bad kane kala wanrah ka jingshong syier ïa kiba shong ba sah ha khappud.
Ha ka juh ka por kila ai khublei ïa ka jinglah kloi jong ka sorkar naduh ki bor District bad haduh u Myntri Rangbah ka jylla kiba la shimkhia manka por ban ïakren ïasuk hapdeng ki ar jaitbynriew.
Kumba long mynta u ma A. Lipon ula ong ba ka Assam ka kwah ban knieh jubor ïa ki jaka puta kiba dang dei ki jong ka Meghalaya, kumta la kyntu ïa ka sorkar ba kan buh noh da ka Temporary Out-post ha Lapangap bad ki pulit ym duna ïa ka 40 ngut ryngkat ki tiar ba biang, khnang ba ki nongrep ha kitei ki jaka ki ïoh ban pyndep ïa ka thung ka tep.
Ula pyntip ba ka shnong Lapangap kala rai ban ai ïa ka jaka ba biang na ka bynta ki pulit, da kaba ong ki paid Karbi ki juh wan ban kyntur pud sha Meghalaya da ka jingsynranlang ki pulit jong ki. Shuh shuh la ong ba kane ka jingpynbeit pud hapdeng ki ar jylla kala sah teng da ki bun bun snem.
