u Myntri Rangbah ka Jylla, u Conrad K Sangma, u la ïashim bynta ha ka jingrakhe ïa ka sngi pyrshah ïa ka jingdih drok ha ka State Convention Centre Shillong.
Ia kane ka sngi rakhe pyrshah ia u droks la pynlong da ka tnat Social Welfare ryngkat ka jingïatreilang bad ki Pulit, ka Meghalaya AIDS Control Society hapoh ka phang “Ka jingiada, ka jingsumar bad ka jingpynkhiah na bynta baroh”.
Ha kane ka sngi la iadonlang u Myntri ka tnad Social Welfare u bah Paul Lyngdoh, ka Agatha Sangma ka Chairperson ka state Commission for protection of Child Rights, ki ophisar ka tnad Social Welfare, ka tnad ka koit ka khiah, ki Rangbah shnong ki nonghikai bad ki khynnah skul bapher bapher ha ryngkat bad kiwei kiba shah khot sngewbha.
Ha ba ai jingkren ha kane ka sngi kum u kongsan u Myntri Rangbah ka Jylla u la ong ba ka sorkar kan buh ha ka jingmut ba khlaiñ ban ïakhun pyrshah ïa ka jingma jong u drok ha Meghalaya. U la ban jur ba ka sorkar ka shimkhia ym tang ban pyntreikam hynrei ban pynbha pat pura, kaba kynthup ïa ki tnad ka koit ka khiah, ka pule puthi, ka jingïadei bad ki samla, bad ka jingïatreilang kaba khlaiñ bad ki paidbah. U la pynpaw, “Ngim lah ban peit ia kane kum tang ka mat pynjari aiñ. Ka dei ka mat jong ka koit ka khiah u paidbah, ka imlang sahlang bad ka roi ka par. Ka DREAM ka dei ka thong jong ngi ban ialeh pyrshah ia u droks ha ryngkat ka jingiatreilang kum ka jylla bad ka jaitbynriew.
U Myntri Rangbah ka jylla u la batai ruh ïa ki jingjop jong ka jylla ha ka jingpyntreikam ïa ka aiñ, da kaba ïasam ha kine ki lai snem ba la dep, ki Pulit ka Meghalaya ki la ïoh ban kurup palat ₹1,000 klur ki dawai pynbuaid ba kynthup ïa u drok heroin, ganja, opium bad crystal meth, bad haduh 1031 tylli ki case kiba la shah ujor na u drugs bad palat 422 tylli kiba la dep ban shah pynngat ha ki kyndon aiñ. Ki Kynhun ka ANTF ka nang pynkhlaiñ shuh shuh haba iadei bad ki tiar na ka bynta ban test ia ki droks bad kiwei kiwei.
U la kyntu ia uwei pa uwei u nongshong shnong, ki nonghikai, ki nongialam shnong, ki seng treimon sngewbha, bad ki longïing ban iatreilang ban rat dyngkhong ia u Droks.
U la bynrap “Ngin ym kdew kti ngin ia snoh kti lang namar ki samla ka jylla ki long ka spah bah jong ngi, bad ngin ym shah ia u drok ban knieh noh ia ka lawei jong ki, bad ngin ialeh lang ia kane ka thma ba ngin jop”.
