Ka Lympung jong ki Khynnah Seng Khasi Seiñraij kaba ju long manla u snem kan long mynta ka kynti ha ka shnong Mukhap West Jaiñtia Hills District ha ka tarik 16 u Kyllalyngkot, 2022 bad ïa kane ka lympung yn pynïaid katkum ki kyndon jingïada na ka khlam Covid-19.
Ban pynphuh pynphieng shuh shuh ïa kane ka lympung ba 16 mynta u snem ki Khynnah Seng Khasi Seiñraij lyngba ki seng bapher bapher kiba don hapoh ka bri u Hynñiewtrep Hynñiewskum ki wan ban ïashim bynta lang ha kane ka sngi.
Kum ban shu pynkymmaw haba u bnai Nohprah 2021 la pynlong ïa ka prokarm ba kyrpang ki khynnah da ki jingïalehkai ba kynthup ïa ka dat moo ñiaw, siat khnam, drawing, riam tynrai bad kiwei kiwei de.
Katba ha kane ka 16-1-2022 la pynkhreh ban pynlong ïa kane ka Lympung ha kaba yn sdang naduh ka por 10 waje mynstep da kaba bud ryntih ïa ki kyndon SOP jong ka sorkar bad ka jingïoh jingbit na u DC ka West Jaiñtia Hills District. La ïathuh ruh ba kiba lah ban ïashim bynta ha kane ka lympung ki long tang kito kiba la dep ban ai tika pura ha ryngkat ka jingdeng bha ïa ka mask na ka bynta ban khanglad na ka jingsaphriang jong ka jingpang khlam.