Ka seng Hynñiewtrep Integrated Territorial Organisation (HITO) Jowai Circle, ha ka jingleit jurip ia ka MCH Hospital, Panaliar Jowai kala lap ba kane ka jaka sumar ka dang don hapdeng ka jingduna jong ki nongtrei naduh ki Doctor, ki Nurse bad ha kiwei de ki bynta kiba iadei bad ka jingsumar ia ki nongpang.
Kumta halor kane ka jingduna nongtrei na ka liang ka HITO hapoh ka jingialam jong u Secretary ma Deibormi Siangbood, ha ka 26 tarik mynta u bnai, kila leit ban buh da ka Memorandum sha u District Medical & Health Officer (DM&HO) jong ka West Jaintia Hills District bad la phah kopi sha u Deputy Commissioner ka West Jaintia Hills District kumjuh sha u MLA ka Jowai u ma Wailadmiki Shylla, ban shimkhia halor kane ka jingdonkam jong katei ka Hospital.
Na ka liang ki nongialam ka seng HITO Jowai Circle kila pynpaw ba kin sa leit ban ia kynduh ruh ia ka Myntri ba dei peit ia ka koit ka khiah jong ka Jylla ha kine ki khyndiat sngi ban dawa ia ki jingdonkam ba kyrkieh jong katei ka jaka ai jingsumar nalor kiwei de ki jingdawa ba donkam.
