Mynta ka sngi ka tnad Pohïing (Home), Police Department kala pynmih ia ka hukum kaba iadei bad ka jingpynkynriah kam ia ki katto katne ki heh Pulit (IPS), hadien ka jingmonjur na u Lat ka jylla.
U Jagpal Singh Dhanoa, IPS (RR:2016) uba ju bat kum u Superintendent of Police, ANTF, Shillong un wan ban shimti ia ka kam Superintendent of Police ka West Jaiñtia Hills District ha ka jaka jong u ma Chemphang Syrti, IPS.
U ma Chemphang Syrti, IPS pat un sa shimti ia ka kam Superintendent of Police (R/PR), Shillong kaba dei ka post ba dang sah thylli haduh mynta.
Kum ban shu pynkynmaw ba u Jagpal Singh Dhanoa, IPS ula ju bat ruh ia ka kam Superintendent of Police ka East Jaiñtia Hills District ha kine ki khyndiat snem ba la dep kata naduh u snem 2021 haduh u 2023.
Kiwei de ki heh Pulit kiba shah pynkynriah kam ki kynthup ia u Giri Prasad M, IPS (RR:2017) uba dei u SP jong ka East Jaiñtia Hills District un shimti ia ka kam Superintendent of Police, ANTF, Shillong ha ka jaka jong u Jagpal Singh Dhanoa, IPS.
U Vikash Kumar, IPS (RR: 2018) uba ju bat kum u SP ka South West Garo Hills District, Ampati mynta un shimti ia ka kam Superintendent of Police ka East Jaiñtia Hills ha ka jaka jong u Giri Prasad, IPS.
U Vikash Varma, IPS (RR:2020) uba ju bat kum u SP, CM Security, Shillong un shimti ia ka kam Superintendent of Police ka South West Garo Hills District, Ampati ha ka jaka jong u Vikash Kumar, IPS.
U Ishan Gupta, IPS (RR:2021) uba ju bat kum u Addl. SP ka West Jaiñtia Hills District, Jowai un shimti ia ka kam Additional Superintendent of Police, CM Security, Shillong ha ka jaka jong u Vikash Varma.
