Ka HNYF kawei na ki sengbhalang kaba peit ia ka bha ka miat jong ka imlang ka sahlang dang shen ka la pan RTI na ka ophis treikam ka District Medical & Health Officer (DM&HO), Jowai, West Jaiñtia Hills bad hadien ka kaiphod ba la lap la shem ba ka don ka jingduna ki Doctor ha Nartiang CHC, ha kaba ka seng ka la dawa ba dei ban thung Doctor shuh shuh ha katei ka jaka sumar.
Kat kum ka jingiathuh jong ka HNYF ba kumba long mynta la don tang uwei u Doctor ha katei ka jaka sumar ha Nartiang CHC bad kane ka la wanrah bun sien ia ka jingdkhot treikam jong katei ka jaka sumar na ka daw jong ka jingduna ki Doctor.
Na ka liang ka Seng kala pan jingshai ruh halor ka jingdon jong ki nongtrei ba shipor (Officiating) ba la thung da ka tnad DM&HO. Hynrei kaba phylla ka long ba wat ka DM&HO ruh kam tip ia kane ka jingdon ki nongtrei. Ka seng kala pynpaw ba kumno ki nongtrei officiate ki lah ban trei bun bun snem, shano don ki nongtrei ba dei hok ban trei bad mano bala thung ia kitei ki nongtrei, kane ka pynpaw ia ka jingleh ar sap jong ka sorkar kaba la buh bhah ia kito kiba briew kiba don ha ka bor, la pynpaw ka HNYF.
Ka HNYF ka pynrem jur ia kane ka rukom thepkam ka sorkar kaba long ka bym paw bym shai. Ka seng ka kyrmen ba ka sorkar kan shim khia ia kane bad kan pynduh noh shi syndon ia ka rukom thungkam beaiñ ha baroh ki tnad treikam jong ka sorkar.
Kane ka long katkum ka jingpyllait khubor jong u D. Symblai Genl. Secy, HNYF Jaintia Zone.
