Ka National People’s Youth Front (NPYF) Jowai Block mynta ka sngi Saitjaiñ kala pynkup burom ïa ki 137 ngut ki samla pule kiba la pass bha haka kyrdan SSLC bad HSSLC ha ka jingïalang bala pynlong ha District Library Auditorium Mynthong, Jowai.
Ha kane ka sngi u MLA ka Jowai Constituency uba dei ruh u State President NPYF Meghalaya bad u Chairman ka MUDA ula long u kongsan, ha ka jingdon lang ki nongkitkam jong ka Jowai Committee NPP, ki Waheh Shnong bad ki kmie ki kpa jong ki samla pule.
Ïa ka jingïalang ha kane ka sngi la pynïaid da u Samehi Laloo, President NPYF Jowai Block uba la pynsngew kane ka dei ka jingsdang jong ka jingai khusnam jong ka seng sha ki samla pule ka thaiñ lyngba ka jingïarap jong u MLA ma Wailadmiki ryngkat ka jingïasnohkti lang jong ki member ka Party na West Jaiñtia Hills District.
U ma Omesa Shylla kum u Resources Person haba ai jingkren, ula ai mynsiem ïa ki samla pule ba kin don shwa ïa ka thong ha ka jingmut jingpyrkhat khnang ba kin poi sha ka jingjop, ula kyntu ruh ban don ka burom ka akor ha ka jingim kaba manla ka sngi.
Kum ki samla pule ki dei ban nang hi ban jied ïa ka laiñ pule puthi ha ka jingim bad ban tip kumno ban bate ïa ka por ha ka jingpule. Ula pynsngew sha ki samla kiba mynta ba ki long kiba donbok eh ha kum kane ka por jong ka juk stad.
U ma Wailadmiki Shylla haka jingkren ula pynsngew ba kane kam dei tang ka jingsam khusnam hynrei yn sa ai jingïasyllok (counselling) sha ki samla pule.
Shuh shuh ula ong ka NYPF kala shim ïa kane ka sienjam hadien ba la jied ïa u kum u State President jong ka NYPF, da kaba u kyntu jur ïa ki nongwan ha kane ka sngi ba kim dei ban sngewthuh bakla ba ka dei ka prokram party hynrei la leh ïa kane ban ai mynsiem ïa ki samla pule ka thaiñ kiba la ïoh 80% shaneng ki mark bad kane long shi bynta ban pynithuh ïa ka jingtreishitom jong ki kaba dei hok ïa ki ban ïoh.
Ula ong kam dei ka ba suk ban pynlong ïa kane ka jingsam khusnam hapoh ka jylla namar ka jingbun kiba pass bha ki samla pule ha ki exam bapher bapher.
Ula ai ka jingïaroh ïa ka samla pule jong ka Govt Girls, HSS Jowai kaba la wan ha ka kyrdan ba shakhmat haka Commerce Stream. Ula pynsngew ruh ba ka NPYF ka dang wad ki lad ki lynti ban ai jingïarap sha ki samla pule da kaba yn sa plie ïaka Student Cell ha Jowai, kynthup ïa ka Scholarship bad ban pynheh extension ïa ka jaka pule jong ka Kiang Nngbah Govt College khnang ba ki samla pule kin ïoh ban rung klas kham bun ïa kane la dep ban Saction pisa da ka sorkar jylla.
Bad kham suk ki samla pule kiba kwah ban pule Nurse u ma Wailad ula pyntip baka sorkar kala dep sanction ban tei ïa ka Nursing College hapoh ka Jowai Constituency bad kane kan long ka jingmyntoi ïa ki samla.
Baroh ki samla pule kiba la ïoh ïa kane ka khusnam kila don haduh 137 ngut kynthup 74 ngut ha ka SSLC bad 63 ngut ha ka HSSLC, la pynphuh shuh shuh ïa kane ka sngi da ka jingrwai, katba ïa ki kyntien ai khublei la ïoh na u Tremiki Sutnga Secretary ka NPYF, Jowai Block.
