Ha ka jingdap shinem ka jingseng nongrim ia ka Laloo & Khon (Tpep-Pale), Jowai ha ka 5/7/2025 ka seng ka la ioh ban rakhe ia kane ka sngi da kaba pynlong ia ka jingsynniang snam (Blood Donation Camp) ha Blood Centre kaba don ha shnong Panaliar, Jowai.
Ia kane ka jingleit synniang snam la lamkhmat da u President ka seng u Waheh Wanmi H.C. Laloo ryngkat ki dkhot jong ka seng. Ha ka prokram kaba lyngkot la ioh ia ka jingkren na ka kong Greely Jone Suchiang kaba dei ka Adviser jong ka Seng, la ioh ruh ka jingpynsngewthuh shaphang ka jingmyntoi jong ka jingai snam da ka Dr. I. Khyriem I/C Jowai Civil Hospital Blood Centre.
Ha ka por janmiet jong kane ka ka sngi ha ka por kumba 3:00 janmiet la don ka prokram jingiakynduh lang jong baroh ki dkhot jong kane Laloo & Khon (Tpep-Pale), Jowai ha kaba la don ruh ki nongshah khot sngewbha ba kynthup ia u kongsan Waheh Heibor U Tre Syngkon uba dei u Waheh Chnong ka Tpep-Pale Dorbar Chnong. Ha ka jingkren jong u, ula ai khublei ia kane ka kynhun kaba don ia ka mynsiem ban iarap para briew da kaba synniang snam. Ula kit bok kit rwiang ia ka, ba kan nangiaid shakhmat, ban don ka jingiaieit bad ka jingiadei jingmut para dkhot baroh.
Kiwei de kiba la shah khot sngewbha sha kane ka prokram ki kynthup ia u Waheh Becareme Dkhar, General Secretary ka Tpep-Pale Dorbar Chnong kum u symbud Kongsan, ka Dr. I. Khyriem I/C Jowai Civil Hospital Blood Centre.
Ia ki kyntien ai khublei la ai da u Vicky E Suchiang uba dei u Secretary ka Laloo & Khon bad ia ka nguhblei pynwai la ai da ka Greely Jone Suchiang.
