Ki dkhot jong ka seng Hynniewtrep Integrated Territorial Organization (HITO), Jowai Circle, hynne ka sngi (7/7/2025) hapoh ka jingialam u General Secretary u Deibormi Siangbood ki la ai da ka shithi ha u Deputy Commissioner ka West Jaintia Hills District, u Abhivav Kumar Singh, IAS, ha ka jingiadei ban pynsangeh shisyndon ia ka jingpyndonkam ia ki plastic bag ha poh ka West Jaiñtia Hills District.
Ka seng ka la kdew ruh ba ka jingpyndonkam ba manla ka sngi ia kine ki Plastic ka la wanrah ïa ka jingsniew kaba khraw ïa ka sawdong sawkun jong ka mariang, namar kine ki plastic ki pynjaboh ïa ki um ki wah bad ki shnong ki thaw, kiba la buh ruh ïa ka jingma ïa ka koit ka khiah jong ki briew kumjuh ruh ia ki mrad ki mreng. Watla ki don ki jingpynsngewthuh paidbah, hynrei ka jingpyndonkam ïa ki plastic bag ka dang ïai bteng, kaba pynlong lehnoh ïa ki jingpyrshang ban pynlong ïa ka mariang kaba khuid bad kaba suba pynpaw ka seng.
Te halor katei ka nongrim, ka HITO ka la wan buh ia kane ka jingkyrpad ha ka ophis jong u DC, ban pyntreikam bad ban pyrkhing ia ki plastic hapoh u pud u sam jong ka District. Ka seng ka kyntu ruh ia u DC ban pynlong da ki jingpynsngewthuh paidbah ha ki skul, ki ïew ki hat bad ha ki shnong ki thaw ban ai jingtip ïa ki paidbah halor ki jingsniew kiba lah ban mih na kine ki plastic. Ha ka juh ka por ka seng ka kyntu ban pyndonkam da ki plactic kiba long biodegradable ne kiba lah ban pyut kloi, namar kine ki plastic kiba pyndonkam mynta ki long kiba shim por ban pyut.
Katba na ka liang u DC ruh u la kular ban shimkhia ia kane ka kam da kaba ong ruh ia ki dkhot jong ka seng kane ka long kawei na ki mat ba donkam ha ka jingiadei bad ka khuid ka suba bad khamtam ruh kawei na ki lad jingiada ia ka koit ka khiah jong ki nongshong shnong.