Mynta ka janmiet jong ka sngi ba ar ki nonglamkhmat ka Sein Raij Jowai, kiba kynthup ia u President ka Seiñ Raij Jowai u ma Hercules Toi ryngkat ka jingiadon lang u Doloi ka Elaka Jowai ma Puramon Kynjing bad u General Secretary Awotki Sumer, lem bad kiwei de ki rangbah ka Sein Raij Jowai, ki la ioh ban ai jingkren sha ki lad pathai khubor ha ka jingiadei bad ka jingpynkhreh ia kane ka Behdeiñkhlam 2025, ka ban sdang naduh ka 11 tarik bad kut haduh ka 14 tarik mynta u bnai July, kaba tip ruh ki lai miet saw sngi. Kumjuh ruh kane ka jinglehkmen Behdeiñkhlam jong ka Seiñ Raij Jowai la ñiew kum kawei na ki State Festival.
Na ka liang jong ki nongpyniaid ka Sein Raij Jowai, ki la pynpaw ba kane ka lehniam shad Behdeiñkhlam kan long kaba phuh ba phieng ha kaba ki ar ngut ki Symbud Myntri rangbah ka jylla kita u ma Sniawbhalang Dhar bad u bah Prestone Tynsong ryngkat kiwei dei ki myntri sorkar bad ki MLA, ki MDC, ki heh sorkar kin iadon lang ha ka sngi pynkut kata ha ka 14.07.2025.Mynta ka sngi na ka liang u President ka Seinraij Jowai kumjuh ruh na u pa Dloi ki la pynpaw ba ki dap da ka jingsngewkmen kaba khraw haba kila ioh biang ban rakhe ia kane ka shad Behdeiñkhlam kum ba ju long. Na ka liang jong ki, ki khot bad wer ia baroh ban iawan sakhi lang sha kane ka jinglehniam shad Behdeiñkhlam ka sein Raij Jowai.
Ka SRJ ka kyntu ruh ia baroh ki paidbah ia ki nongshong shnong jong ka sor Jowai ne Jaintia bad ia baroh ym tang ia ki kynhun ka niam tynrai hynrei ia baroh ki para doh para snam ban iasnoh kit lang ha kane Shad Behdeiñkhlam jong ka sein Raij Jowai namar kane ka shad Behdeiñkhlam ka long na ka bynta ka koit ka khiah ban lait na ki jingpang bapher bapher ym tang katta hynrei ban im tip briew tip blei bad kumjuh ruh ban iaid beit ka kamai kajih.
Kumta ka SRJ ka khot ka wer lang ïa baroh ki khun ka niamtre bad ïa ki nongshong shnong ka jylla bad kiwei ban wan sakhi lem ïa kane ka Behdeiñkhlam 2025 ha nongbah Jowai.
Ka sein Raij Jowai ka la pyntip ruh ia ka rukom iaid bad ieng ki kali kiba wan ban sakhi ia kane ka Shad Behdeiñkhlam kum ki no entry, ki jaka buh ne pynieng ia ki kali parking, kiba la pynbeit da ka tnat Pulit jong ka nongbah Jowai.
