Ka Meghalaya Human Rights Commission (MHRS), Shillong hynne ka sngi ka 8 tarik Naitung 2025, ka la pyntip sha u SP East Khasi Hills, Bah Vivik Syiem ba ki dei ban pynioh noh ia kaiphod ha shwa ka 31 tarik mynta u bnai halor ka jingshah bom u samla Getwin Jyrwa (19 snem) ha Sohra Police Station.
Katkum ka ejahar ba la phah sha u SP la kdew ba ha ka 3 tarik Naitung 2025, ka kmie ka la wan ialam ia u khun jong ka u Getwin Jyrwa sha Sohra police station ha ka por kumba 9 baje mynstep, bad ha kane ka janmiet hi ka la shaw noh ia u khun na police station, hynrei kaba lyngngoh ka long ba u khun jong ka, u la shah bom shah tied ha ki pulit haduh ba u la mynsaw jur bad kumta ka la ialam noh ia u sha Sohra CHC, ha kaba hadien ki la phah rah noh sha Civil Hospital Shillong bad u la shah sumar ha kane ka hospital haduh ka 7 Tarik Naitung.
Ha ba kren sha ki lad pathai khubor u Superintendent of Police (SP City) u bah Hubert P. Kharkongor u la iathuh ba kane ka kam ka dang iaid shakhmat na ka bynta ban tohkit bad pyntikna halor ka jingjia ia utei u samla namar ka jingpoi jong u sha thanad ka dei na ka jingioh khubor ba u poi iashoh bad katto katne ki briew, kumta ban ioh ia ka kaiphod ba tikna, ka tnad pulit kan kham tih jylliew na ka bynta ban ai ia ka kaiphod.
