Da ki spah ngut ki nongshong shnong jong ka thaiñ Khanduli kila ioh jingmyntoi na ka Health Camp kaba la pynlong mynta ka sngi 8 tarik Naitung 2025 da ka tnad District Malaria ha ryngkat ka jingiatreilang ka ophis District Medical & Health Officer, Jowai, ha ka shnong Khanduli, West Jaintia Hills District.
Ka jingthmu jong kane ka Health Camp ka long wanrah ia ki lad jingiarap kham jan sha ki nongshong shnong ba ki thaiñ nongkyndong ha ka liang ka jingkoit jingkhiah. Kala don ruh ka jingkren pynsngewthuh shaphang ka jingiada na ka jingsaphriang jong ka jingpang Malaria nalor kiwei de ki jait jingpang.
Ha kane ka prokram kila don ki stall bapher bapher kiba la buh ban peit halor ki jait jingpang bapher bapher. Ki nongtrei jong ka tnad ka koit ka khiah kiba la wanpoi na Shillong nalor kiba napoh ka District ruh kila iadon bynta lang ban ai jingsumar bad examin ia ki nongpang nalor ka jinghikai kaba paka ban sngewthuh halor ki jait jingpang khamta ka jingpang Malaria.
