Ka Shad Behdeiñkhlam ba ‘saw sngi lai miet’ jong ka Seiñ Raij Jowai kala sdang mynta ka sngi (Pynsiñ) 11 tarik u Naitung, 2025 kala long kaba iphuh iphieng ha ryngkat ka jingrisa bad ka jingud ka Bom ka Bhuri ba la shim bynta da ki Khun ka Raij kiba la leit rah na khlaw ïa ka “Symbood Khnong” bad pynpoi ïa ka ha ‘Tre Kjat Loomsooïung’ New Hill Jowai.
Ïa ka shad shad Behdeiñkhlam mynta ka sngi la sdang naduh ka por mynstep ba la don ka bam Tyngkong ha ‘Iung Langdoh’ nangta ki khun ka Seiñraij Jowai kila pynkhreh ïa ka Siang ka Pha ban pyndep da ka kmie jong ka ïing kum ka jingburom ïa ki dkhot jong ka ïing kiba la khlad na sla jong kane ka pyrthei.
Katba ha ka por janmiet ki khun ka Chilliang Raij (Khon Raij) kila leit rah na khlaw ïa ka “Symbood Khnong” ha ryngkat ka shad ka kmen, ka pud ka tem ha shi lynter lynti haduh ban da poi ha New Hill Jowai.
Lashai ka sngi ba ar kaba dei ka ‘Mulong’ jong ka 12 tarik u Naitung naduh ka por mynstep u Dolloi, u Langdoh bad ki Waheh Wasan kin sdang ïa ka nguh ka dem ha ka “Syiem Aitnar” hapoh ka jingpynlut pynsep jong u Dolloi.
Ha ka por jainmiet baroh ki Kmai Raij naduh ka dong Panaliar, Dulong, Lumpyrdi Ïongpiah, Lumïongkjam, Tpep-Pale, Lumkyrwiang kin pynpoi ïa ki Deiñkhlam ha Iawmusiang ha ryngkat ka shad ka kmen bad ka put ka tem, katba ki khun ka Raij kin pynpoi ïa ka ‘Khnong Blai’ ha Loo Sooïung.
