Ka Synod College hynne ka sngi ka 12 tarik Naitung 2025 ka la pynlong ia ka Health camp ha ryngkat ka jingiatreilang bad ka tnad ka koit ka khiah jong ka sorkar jylla.
Ha kane ka sngi ba pynlong ia ka Health Camp la ia don ryngkat lang naduh ka District Medical Health Officer Dr Angel Kharduit, Dr.NE Kharsohnoh Joint Director jong ka NHM, Dr M Rani Vice Principal Synod College, ki khynnah pule bad ki doctor na ka tnad ka koit ka khiah.
Haba ai jingkren ha kane ka sngi na ka liang i Dr NE Kharsohnoh i ai khublei ia i Principal jong ka Synod College i Dr Mrs G Lyngdoh iba la kloi ban shimkhia ban iatreilang bad ka tnad ka koit ka khiah ban pynlong ia kane ka Health camp hapoh kane ka College.
Shuh shuh i la ong baroh ngi ia tip ka jingkoit jingkhiah ka dei ka spah bah bad ka jingkoit jingkhiah ka dei ka jingim ba kongsan ha ngi ki briew.
I la bynrap ka jingpynlong ia kane ka health camp kan ai jingmyntoi khambha ia ki khynnah pule namar lada don ia ka jingkoit jingkhiah ka jabieng ruh ka kham proh bad ki lah ruh ban pynleit jingmut khambha ha ki jingpule.
Ka jingpynlong ia kane ka Health camp ka long ruh shibynta ban ai jinghikai ban lait na ka jingpang ba iabit kum ka jingpang shadem, ka jingpang cancer bad kiwei kiwei.
Shuh shuh i la ong ia ki khynnah pule lyngba kane ka health camp kin pynshlur ia ka ïing ka sem ia ki paralok ban wan shakhmat ban phah test khnang ban ioh ka jingkoit jingkhiah bad ban ioh ka met ba koit ba khiah.
