Hapdeng ka iphuh iphieng ka kynhoi ka risa ka shad ka kmen ki paidbah hynne ka sngi, ka sngi ba pynkut ia ka lehniam bad ka rong Behdeiñkhlam ha Pung Aitnar, wan ka khubor ba sngewsih ha kaba ka Kali kaba synran (Escort) ia ka Cabinet Minister ka kong Mazel Ampareen Lyngdoh ha ka jaka kaba la bthah ban pynieng da ki Nongpyniaid ka Seinraij Jowai ka la shah pynjulor ha uwei u briew (ia uba ym pat kwah ban pynpaw kyrteng) na ka kynhun kaba wan na Umshangyiar sha Pung Aitnar.
La ong ba kane ka Kali kaba escort ia ka Dr. Mazel Ampareen Lyngdoh ka la julor shibun ha kaba la pait ka Wind shield (ka iit kaba shakhmat), la tied la kyrdem ia ka Bonnet bad la pyrshang wat ban ktahkti ia ki Security Personnel kiba don hapoh kane ka Kali. Ki Pulit Escort (Security Guards) kiba don ha kane ka kali ki la kynrup bad kem shisyndon ia une u Nongpynjulor.
Ka Dr. Mazel Ampareen Lyngdoh ka la wan sha Jowai ban ia sakhilang ia kane ka sngi pynkut ia ka Lehniam bad ka rongnohrot Behdeiñkhlam ka Seinraij Jowai ha Pung ka Syiem Aitnar bad ka jingkynthoh na kiba bun ki ong ba kane ka jinglehdusmon ia ka Kali kaba escort ia ka, ka thew ia ka Dr. Ampareen hi. Haduh ba thoh ia kane ka Khubor u Nongpynjulor ia kane ka Kali kaba escort u la don ha kti ki Pulit bad ka jingtohkit ia u ka dangiaid.
Kum kane ka jingjia kaba ym pat ju jia ha ki snem kiba la leitnoh ka long kaei kaei kaba ktah ia ka burom ka ijot jong kiba bun kiba lang bad ia ka jaitbynriew hi baroh kawei.
