Ki paidbah jong ki lai tylli ki shnong ka Nongtrai Sepngi jong ka thaiñ Langdongdai, ha ka sngi hat majai ki la ia mih paidbah ban maramot hi ia ka surok kaba la jot, kat haduh ba ka la pyndik haduh katta katta ia ka leit ka wan ki paidbah nongshong shnong.
Ryngkat ki tiar kum ki mohkhiew, ki lyngka bad ki kali ban kit maw, ki paidbah nongshong shnong naduh Mawsmai haduh Malangkona, ki la ia mih ryntih naduh ka por 9 baje mynstep ban maramot ia ka surok kaba 15 kilometer.
Ha kane ka jingmaramot la mih shim bynta lang ruh da ki riew rangbah naduh ki sordar shnong, secretary shnong bad ki riew paidbah haduh ban pyndep kata haduh ka por 4 baje nohphai sngi.
Na ka liang u Assistant Secretary ka shnong Nonghawei, u la ong ba kane ka surok ka long kaba donkam namar ka dei u budlum ia ka khaïi pateng bad ka leit ka wan haduh 21 tylli ki shnong.
Ki paidbah shnong naduh Mawsmai, Mawkhar, Nonghawei bad kiwei kiwei ki shnong, ki dei kiba im ha ka rep ka riang. Kumta donkam ban pynbha ia ki surok kali khnang ba kan pynsuk ia ki nongrep ha ka khaïi pateng bad ka surok ba bha kan kyntiew ruh ym tang ia ki nongrep, hynrei ka long kaba donkam kyrpang ia kiba pang ba shitom.
Na ka liang ki riew rangbah ki la pynpaw ka jingdiaw mynsiem namar ka jingbym shimkhia jong ka sorkar MDA ba la ialam da ka NPP. Kumta ki sngew ban kyntu sha ki bor sorkar, ka tnad PWD bad khamtam ia u MLA, ba un phai khmat bad sngewlem halor ka jingeh ki paidbah ha kaba ia dei bad ka leit ka wan, da kaba pynioh noh ia ki surok rong kiba bha kumba ioh lem kiwei pat ki para nongshong shnong hapoh ka Jylla.
