Ka Hynniewtrep Integrated Territorial Organisation (HITO) mynta ka sngi (16/7/2025) hapoh ka jingialam u General Secretary sengkmie u bah Wanbun N Dkhar bad u Lawyerson War ki la leit ban ujor sha ka Meghalaya Human Right Commission halor ka Ejahar kaba la buh naduh ka 5 tarik Naitung 2025 ban dawa khang noh ia ki Weight Bridge Cum-Forest Check point bad ia ka Ratacherra forest beat office jong ka Jaintia Hills Autonomous District Council.
Kumban shu pynkynmaw ba ka seng kala buh ia katei ka Ejahar pyrshah ia kitei ki khyrdop ka JHADC hadien bala ioh ia ki jubab lyngba ka RTI kaba la kdew ba ka JHADC kam shym la aiti ne thung iano iano ban pyniaid ia kitei ki khyrdop bad sa kawei ruh ba kitei ki khyrdop kim shym la ioh jingbit na ka Ministry of Road Transport and Highway lane na ka National Highway Authority of India ban buh ne shna ia kino kino ki khyrdop ha ki National Highway.
Nalor kane na ka liang ka seng kala ujor sha ka Human Rights ban lap na kiei ki daw ba ka office u Superintendent of Police, East Jaintia Hills District kam shym la leh ei ei halor katei ka Ejahar kaba la dep ban ai naduh ka 5 tarik la pynkut ka kyrwoh.