Ha kawei na ki jingjia bym ju kham jia la ioh jingtip ba uwei u tymmen uba la 75 snem ka rta ba la tip kyrteng kum u Sher Singh, na ka shnong Kot Majri, Yamunanagar District jong ka jylla Haryana ula im biang shwa ban pyndep ia ka jinglehniam ba khadduh ia u.
Hadien ba ki Doctor jong ka wei na ki Hospital private kaba paw hapoh Yamunanagar kila pynbna ba u Sher Singh ula khlad noh, kumta la pyntip ia kiba ha ïing ha sem jong u. Na ka liang jong kiba ha ïing ruh kila pynkhreh pynkhrum ia baroh ki jingdonkam katkum ka niam ka rukom jong ki ban ioh leit on thang noh ia ka met jong u Sher Singh.
Hynrei ha shwa ban pyndep khadduh ia ka jinglehniam, kiba ha ïing kila sei noh ia u pipe ring mynsiem bala pyndait ha ka khmut jong u ban ioh pynsum khadduh ia u, kyndit kyndit une u tymmen u la sdang ban ring mynsiem biang. Kane kala wanrah ka jingkmen kaba khraw ia kiba ha ïing ha sem baroh bad wat ia ki para marjan marpa bad ki lok ki jor kiba la wan pynshngaiñ lem.
Mar mar kiba haïing kila leit pynkit biang ia u Sher Singh sha Hospital bad mynta ula don hapdeng ka met ka phad kaba koit ba khlaiñ.
