Kum ka dak ban kynmaw ia ka lyngkhuh sngi iap ba 190 snem jong u Paiem Tirot Sing Syiem mynta ka sngi ka 17 tarik Naitung 2025, ki nongialam sengbhalang bapher bapher ba kynthup ia ka NESO, KSU, FKJGP, HYDC bad ki nongniah taksi ki la wan buh syntiew ha u Mot jong u Tirot Sing ha Madan ïewrynhep Shillong.
Haba kren ha kane ka sngi na ka liang u President ka KSU u Bah Lambok Star Marngar u la ong, “Ngi dei ka jaitbynriew kaba khih kaba ksar bad ka jaitbynriew kaba ïeng ialeh na ka por sha ka por, ki ba bun ki ong ka jaitbynriew jong ngi kaba dap tang ka jingeh bad ka jingtynjuh na kawei ka por sha kawei ka por bad na kawei ka snem sha kawei ka snem, katba ka jaitbynriew ka dang im ki jingtynjuh ki dang mih na kawei ka sngi sha kawei ka sngi.”
Shuh shuh u la ong ka shong ha ki trai khyndew, kiba shong ha kane ka bri u hynniewtrep kaei kin leh na ka bynta ban tei ia ka lawei bad ka shongsuk shongshngaiñ, ki samla kiba kit ba bah ia ka jaitbynriew, ki iakynduh shibun ki jingeh, ki mad ia ki jingeh kiba thymmai ha ka rukom pyrkhat pyrdaiñ ruh.
U la bynrap ki mat bad ki issue bapher bapher ba kum ka seng bad kiwei ki sengbhalang ngi la pynsngew ia ka shongsuk shongshngaiñ jong ka ri bad ka jaitbynriew baroh kawei.
Shwa ban pynkut u la ong katba dang im ha sla pyrthei, katba dang ring mynsiem kum ki samla ngim dei ban duh mynsiem bad duh jingkyrmen, bad khmih lynti ia kita ki Contracual MLA kiba shong ha Secretariat, hynrei ngi donkam ia ka mynsiem ba shynrang jong uwei pa uwei u khun ka bri hynniewtrep baroh kawei.
Na ka liang u President ka HYDC u Bah Wyraiwan Sohtun u la ong kane ka lyngkhuh sngi iap ba 190 snem jong u Paiem Tirot Sing ka thma na ka bynta ban pynim ia ka jaitbynriew ka la sdang ha ki por jong u Paiem Tirot Sing bad ka dang iai neh haduh ki por kiba mynta hynrei kane ka thma kaba mynta ngi iakhun ban pynim ia ka ri bad ka jaitbynriew ka jong ngi ka wan ha ki bynta kiba pher kiba pher.
Shuh shuh u la ong na ka liang ka Seng HYDC ka la ju kren na ka por sha ka por ban im ka ri bad ka jaitbynriew, ki samla kiba mynta ki dei ban don ia ka mynsiem ban ïakhun ban synshar hi ia ka ri kaba ieid eh, hynrei haduh mynta ngim pat iohi ba ngi lah ban synshar ia ka ri ba ieid jong ngi.
“Ngi iakhun ia ka thma mynta ban im lashai ban pynbiang ia ka kam ka jam ha man la kawei pa kawei ka longïing longsem ba ngin lah ban kyntiew ia ka lawei ka ban sa wan bad ka thong ka dei ban don ha man la uwei pa uwei samla u khraw pyrkhat u dei ban don hapoh ka mynsiem” U la bynrap.
Khatduh khawai u la ong katno ngut ki samla ki la ioh kam ha lafarge company bad katno ngut ki samla ki la ioh kam ha ki cement company kiba don ha jylla meghalaya , ka jingiohkam ki samla jong ngi naduh Byrnihat, sha Jaintia Hills shaduh Lafarge ka duna ia ka 5 percent, ki wan ban thied lut ia ka spah ka phew bad rah lut, bad tang kawei ka thma mynta kam pat kut, ka dei ka bynta jong ngi ki khun samla ban shim ia ka lyngkor ban kit na ka bynta ban im ka jaitbynriew pynkut u President ka HYDC Hynniewtrep Youth Development Council.
