Ka President ka Ri India, ka Droupadi Murmu ka la sam ïa ki khusnam Swachh Survekshan 2024-25 ha Vigyan Bhagwan, New Delhi kaba la pynlong da ka Tnad Housing and Urban Affairs (MoHUA). 23 tylli ki nongbah Super Swachh League ki la ioh ia ki jingpynkup burom ha ka jingiadonlang u Myntri Sorkar Pdeng u Manohar Lal bad u Myntri Khynnah, MoHUA u Tokhan Sahu. Ka pateng kaba thymmai jong ki nongbah kiba khuid jong ka Ri India ki la poi ha kaba ka Ahmedabad, Bhopal bad Lucknow ki la paw kum ki Swachh Shehar kiba hakhmat eh. La pynbna 43 tylli ki khusnam jong ka ri, ryngkat bad ka jingithuh kyrpang ia ka Mahakumbh.
Ka nongbah Shillong ka la ioh khusnam hapoh ka thup ‘Promising Swachh Shehar of State/UT’. La jied baroh 34 tylli ki nongbah ha kylleng ki Jylla bad ki Union Territory bapher bapher na ka bynta kane ka jingpynkup burom katkum ki jingpyrshang jong ki ha kaba kyntiew ïa ka jingkhuid jingsuba, ka jingpynkhuid ïa ki jaboh jabaiñ, bad ka jingïashim bynta jong ki nongshong shnong.
Ha ka jingïalang ban sam ia ki khusnam Swachh Survekshan 2024-25, u Myntri Sorkar Pdeng u Manohar Lal u la sam ïa ka khusnam kum ka Best Ganga Town sha ka Prayagraj, katba ïa ka Secunderabad Cantonment la pynkup burom kum ka Best Cantonment Board namar ki jingtrei shitom jong ka ban lehkhuid kaba long ka nuksa. Ia ka GVMC Visakhapatnam, Jabalpur, bad Gorakhpur la pynbna kum ki Best SaifaiMitra Surakshit Shehar namar ka jingshimkhia kaba khraw jong ki na ka bynta ka jingshngain bad ka burom jong ki nongtrei kiba pynkhuid. La ai ka jingithuh ba kyrpang ia ka sorkar jylla jong ka UP, ka Prayagraj Mela Adhikari bad ka Prayagraj Municipal Corporation, na ka bynta ka jingpynkhuid ïa ki jaboh jabaiñ ha sor ha ka por jong ka Mahakumbh, ka jingïalang kaba heh tam ha ka pyrthei, kaba la sakhi ïa ka jingwan jong ki briew haduh kumba 66 klur ngut.
Haba ai jingkren ha kane ka jingïalang, ka President ba donburom jong ka ri India ka la ai khublei ïa ka Tnad kaba la kyntiew ïa ka Reduce, Reuse, Recycle (3R) bad ka la ai jingsngewnguh na ka bynta khusnam ‘Ka jingjaboh sha ka spah’ ba la ai ia ka. Ka “Waste is best” kadei ka mantra bad ka ai bor ia ka jinglong tylli ha ka ioh ka kot”, ka la bynrap. Ka la pynpaw ia ka bynta jong ka ha kaba pynkupbor ia ki samla, ban pynmih ia ki kam kiba khuid, bad ban thaw ia ki lad ban seng kam seng jam, ban pyniasoh bad ki SHG. “Nga sngewkmen ban iohi ba ki nongbah ki la pdiang ia ki jinglong tylli ha ka ioh ka kot bad ka swachhata kum shi bynta ka swabhav bad ka sanskaar jong ngi. Ka President ba donburom ka la ai khublei ia ki nongbah kiba don hapoh 1 lak ngut ki nongshong shnong kiba la buh ia ki kyndon kiba bha tam jong ka swachhata. Ka la ïaroh kumno ki jingïarap jong ki skul, ki sienjam na ka bynta ki startup kiba jied ia ki jait niut na ki jaka ba pynmih ia kine, ki jaka ba khlem pynmih jaboh ki pynlong ïa ka jingkut jingmut na ka bynta ka Swachh Bharat kaba kham khlaiñ. Ka la pynkut,” ka Viksit Bharat jong u snem 2047 kan long ka nuksa ïa ka pyrthei”.
Ha kane ka sngi la pyllait paidbah ïa ka Swachh Survekshan 2024-25 Results Dashboard lyngba ki lad digital, kaba ai ïa ka jingïathuh lyngkot halor ki kyrdan bad ki jingjop. Ia ki mat ba kongsan jong ka Swachh Survekshan 2024-25 bad ki jingjop jong ki Nongbah jong ka Super Swachh League la pyni lyngba ki jingpyni ba itynnad bad ki jingpyni dur, kiba pyni ia ka kam bad ka jingiar jong ka kam ban wanrah ia ka jingkhuid ha ka ri baroh kawei.
