Ka Seng Federation of Khasi Jaintia & Garo People (FKJGP), East Jaintia Hills District Khliehriat hapoh ka jingialam jong u President ka Seng u Deihok Sumer ha ka jingiadonlang u Welking Swer Vice President, Andiwor Pala, Organising Secretary, Ienglang Siangshai Assistant Sports Secretary kamjoh u Mathew Pajat President FKJGP SEBA Circle, ha ka 18 tarik mynta u bnai kila hiar sha ka Shnong Lakadong Ummat na ka bynta ban sam ia ki Dustbin ne jaka bret ñiut sha ki skul kiba don hapoh ka Lakadong Ummat.
Ia kine ki Dustbin la ai lyngba ka FKJGP Lakadong Ummat Unit hapoh ka jingpyniaid jong u President ka Unit u Leki Hynthong bad u General Secretary u Kymmo Patwad.
Ki nongialam jong ka seng ki ong ba hadien ka jingrakhe ia ka sngi pynneh pynsah mariang lane ka World Environment Day mynta u snem kaba la pynlong ha Dkhiah East Secondary School, Dkhiah East lyngba ki prokram bapher bapher halor ka phang “Ending Plastic Pollution Globally”, na ka liang ka Seng kala sngewkhia shibun halor ka jingbret pathar ia ki plastic kaba la ktah shisha ia ka mei mariang.
Kumta ka Seng ka la shim ia ka sienjam ban leit sha kylleng ki shnong kiba ka don ia ki Unit treikam na ka bynta ban ai ka jingpynsngewthuh halor ka jingpynjulor jong ki plastic ia ka mei mariang.
Ha kane ka sngi la pynlong ia ka jingialang kaba lyngkot ha Dorbar Hall jong ka shnong Lakadong Ummat, ha ka jingiadonlang ki nongpyniaid shnong, ki nonghikai. La sam ia ki Dustbin sha ki 4 tylli ki skul kiba don ha kane ka shnong bad kawei la buh hapoh ka Dorbar Hall jong ka shnong.
Na ka liang ki nongialam jong ka seng kila buh ka jingkyntu ban pyndonkam hok ia kine ki Dustbin bad ban pdiang ia kane ka jingai wat la ka long kaba rit ruh, pynkut ka kyrwoh.
