U ma Kerlang Ksoo, u wei na ki nongsaitaiñ uba na ka shong Dkhiah West, East Jaintia Hills District mynta ka sngi ula buh da ka jingthoh sha ka ophis jong ka District Social Welfare Officer (DSWO), East Jaintia Hills District na ka bynta ban buh ka ka jingkyntu ia katei ka tnad ban shimkhia bad peit thuh bha ia ki katto katne ki briew kiba don jingduna kiba iaid bad shang makia sha kylleng ki bynta jong ka District.
Da ka mynsiem kaba sngewkhia une u nongsaitaiñ ula pynpaw ba ki don katto katne ki briew kiba ula ithuh dalade kiba don jingduna ha ka bor jingmut jingpyrkhat kiba dei na ki thaiñ Ladrymbai bad Khliehriat ki shait shang makia kylleng kylleng ki jaka bad iaid ruh pynbud ia u surok bah NH-6. Kane ka jingiaid makia jong ki ka lah ban wanrah ka jingma bad jingmynsaw ia ka jingim jong ki, nalor ba ka wanrah ruh ka jingthut ia ki riew paidbah.
Une u rangbah ula pynpaw ba wat la ki don katto katne ki riew paidbah ki kloi ban iarap lem ia kine ki briew ba don jingduna hynrei ka long pat ka ba eh kum ki riew paidbah ban pyniadei bad kine kiba don jingduna, namar ba kim long kiba la pyntbit ha kane ka kam.
Kumta u ma Ksoo ula buh ka jingkyntu ia ka DSWO kaba la biang ki nongtrei kiba la tbit ha kane ka liang ba kin sngewbha ban shimti ia kum kitei ki briew ba don jingduna ha ki bor jingmut jingpyrkhat, ban sumar bad ban pynbiang ia ka jingdonkam jong ki, kumba la kyrshan ruh da ka ïingbishar badonburom jong ka Meghalaya High Court katkum ka PIL No 1/2015.
