Mynta ka sngi Saitjaiñ, hapoh ka jingialam u Waheh Shnong ka Chnong Chilliang Raij Jowai u ma D.H. Pde ryngkat bad kiwei de ki dkhot ka shnong kumba juh leh na ka por sha ka por, ki la pynlong biang ia ka jingthung dieng ha Riat Turiem harud lynti bah Jowai-Shillong.
Ha kaba ha kane ka sngi ka kynhun ka la ioh ban thung haduh 150 tylli ki tynrai dieng kiba kynthup ia ki jait tynrai dieng kum ki Champa, Rtiang, Puma, Satew, Dieng-doh, Sohphie (Saphai) bad kiwei de ki jait dieng, u ma Pde u la ong ba kane ka long kum kawei na ki dak ka jingsngewnguh ia ka Mei Mariang kumjuh ruh ia ki trai jaka kiba la ailad bam pom ia ki dieng jong ki ha ka por Behdeiñkhlam.
Shuh shuh u ma Pde u la ong ba kane ka jingshim bynta ka jong ki ban thung ia ki tynrai dieng ka long ruh kum shi bynta ban iasnoh kti lang bad ka World Environment Day. Ha kajuh ka por ruh ka long ka kamram ki nongshong shnong ban kheiñ kor ia ka mariang ban iada ia ka Mei Mariang, namar kumba long mynta la iohi ia ka jingshah lehbeiñ bad pynjot ia ka mariang ha kiba bun ki liang.
Kumta kane ka long kum ka nuksa kaba rit kum kita ki nongshnong shnong kiba don kata ka jingkit khlieh bad ban pyrkhat na ka bynta ka lawei jong ki ban dangwan, la ong u ma Pde.
