Ka Hynniewtrep Integrated Territorial Organisation (HITO), sengkmie lyngba ka kyrwoh na u General Secretary u bah Wanbun N Dkhar, kala ai khublei Behdeinkhlam basuk bad ba kmen ia baroh ki khun ka Seiñraij Tuber kaba dei kawei naki Behdeiñkhlam kaba heh tam hapoh ka rilum Jaiñtia ka ban pynkut haka 22 tarik Naitung 2025.
Ka seng lyngba u GS ka la ong ruh, ai ba kane ka lehniam shad Behdeiñkhlam mynta u snem, kan long kaba shong kun shong Blei bad kaba iaid beit iaid ryntih khlem don kano kano ka jingwit jingthut da ka jingiarap u trekirot nongbuh nongthaw.
U ma Wanbun, u ong ruh ai ba kane ka Behdeiñkhlam jong ka Seiñ Raij Tuber kan wanrah ia ka jingkoit jingkhiah ia baroh bad jingseisoh ka rep ka riang kumjuh ruh ban iaid beit ka kamai kajih bad kiwei de.
