Ban iada ia ka koit ka khiah jong ki paidbah bad ban pynduna ia ka jingpyndonkum duma, ki Pulit jong ka East Khasi Hills District kila pyntreikam ia ka kyndon aiñ kaba la tip kum ka Cigarettes and Other Tobacco Products Act (COTPA), 2003 da kaba pyrkhing ia ka jingdih duma ha ki jaka paidbah bad ruh ia ka jingdie beaiñ ia ki duma hajan ki skul bad ki college.
Mynta ka sngi ki Pulit jong ka Cantonment Beath House bad ka Lumdiengjri Police Station kila pynlong ia ka jingjurib bad kila ioh ban bat shibun ngut ki briew kiba la pynkheiñ ia kane ka aiñ. Ia kane ka jingjurib la pynlong ha man la ki Police Station, Outpost bad ki Beat House ha kylleng ki bynta jong ka District. Kane ka jingleh ka long shi bynta na ka National Tobacco Control Programme (NTCP) kaba la pyntreikam da ka Health & Family Welfare Department hapoh ka National Health Mission (NHM), Meghalaya.
“Kane ka jingjurib ki Pulit ym dei tang ban ioh daiñ kuna ia ki briew, hynrei kan dei ka jingpynkylla ia ka jinglong jingim bad ka jingiada ia ki khyllung ki khynnah, ki tymmen bad kumjuh ruh ia kito ki bym dih duma. Ka thong jong ngi ka long ban pynlong ia ka Jylla ka ba lait na u duma (Tobacco-free Meghalaya)” la ong u wei na ki heh Pulit.
Kane ka jingleh jong ki Pulit kala ioh jingiaroh na ki riew paidbah ba bun, la pynpaw ki samla pule jong ka St. Anthony’s College.
“Ki don shisha ki khynnah bad wat ki rangbah ruh kiba la ioh jingshitom na ka jingdih duma. Ki Pulit jong ka Meghalaya ki la leh ia ka kamram kaba khraw ban iada ia ka jingim briew” long ong shuh shuh kine ki samla pule.
I Dr. Nabneeta D. Mawrie, NTCP State Nodal Officer ila ong ba “U duma u wanrah ka jingpang Cancer ba bun jait kumba 40 %, na kane 90% ki dei ki ioh ia ka Cancer ha ki bynta ka syntur (Oral Cancer). Ngi iaroh ia ki Pulit kiba shimkhia ia kane ka kam”.
Kum ban shu pynkynmaw ha ki lai bnai kiba la dep ki Pulit jong ka East Khasi Hills ki la daiñ kuna haduh 1178 ngut bad ka pisa kaba mih na ka jingdaiñ kala kot sha ka Rs.99,280/- (Khyndaiphew Khyndai Hajar Arspah Phraphew) tyngka.
Kane ka jingiatreilang jong ka Meghalaya Police bad ka NTCP Meghalaya kan ialam sha ka lynti jong ka jingkoit jingkhia bad ka imlang sahlang kaba lait na u duma, pynkut ka khubor.
