U Deputy Commissioner ka West Jaintia Hills District u ma Garod LSN Dykes, IAS mynta ka sngi ula pyllait bad aiti ia ka Final Electoral Roll sha ki nongmihkhmat jong ki Seng Saiñhima Sima hapoh ka District.
Ia ka jingialang la pynlong ha DC Conference Room ha kaba la iadonlang i Additional Deputy Commissioner (Election) kong D.D Syngai, Additional Deputy Commissioner bah Alexander Mukhim, Extra Assistant Commissioner bah W. K Kharbuli bad ki nongtrei jong ka tnad Election.
Haba ai jingkren lyngkot ka kong D.D. Syngai kaba dei peit ia kane ka kam, ka iathuh ba ka jingdon jong ki nongthep vote haduh ba la pyndep ia ka Final Electoral Roll (01.01.2022) na ka bynta ki 5 tylli ki LA Constituency ba kynthup ia ka 1- Nartiang ST, 2- Jowai (ST), 3- Raliang (ST) and 4- Mowkaiaw (ST) and 7- Amlarem ki don 1,90,575 ngut. Ka la ai khublei ia baroh ki nongmihkhmat jong ka seng saiñ hima sima, ia ki BLOs, ki Supervisor bad ia ki Field Officer kiba la trei shitom na ka bynta ban lum ia ka jingtip kaba thikna.
Shuh shuh ka kong Syngai kala iathuh ba na ka liang jong ka ophis u Deputy Commissioner ka khot bad kyntu ia baroh kito kiba la biang rta hynrei ki bym pat dep ban pynrung kyrteng ialade kila dei ban pynrung noh ialade, khnang ba kin ioh ban pyndonkam ia ka hok jied nongmihkhmat jong ki.
