Ka Khun Hynniewtrep National Awakening Movement (KHNAM) mynta ka sngi ka 24 tarik Naitung 2025 ka la wan ai da ka Right To Information (RTI ) sha ka Ophis jong ka Shillong Municipal Board haba iadei bad ki nongdie madan ha Khyndailad.
Haba kren bad ki nongthoh khubor u Working President jong ka Khnam State Youth Wings ,u Bah Joseph Pyngrope ,u la pynpaw ka mat kaba nyngkong kaba ka Khnam ka la pan RTI ka dei halor ka katno ngut kiba ioh license ban shong die madan ha Khyndailad, bad katno ngut kiba ioh license ban shong dukan ha Khyndailad. Ka mat kaba ar ka dei halor katno tylli ki dukan kiba ka sorkar ka la pynshna hapoh Muda Parking lot bad katno ka sanction haba iadei bad ka jingshna ia ki dukan ha Muda Parking Lot.
Ka mat kaba lai ka dei katno ngut ki khasi kiba ioh shong dukan ha kitei ki dukan thymmai ha Muda bad kiwei ki jaitbynriew katno ngut ki ioh la pynpaw ka Khnam ha ka RTI.
Shuh shuh u la ong, na ka liang ka khnam ka kwah ban pan jingshai na ka Shillong Municipal haba iadei bad kiwei ki jaitbynriew kiba la ioh license, ka tnad municipal ka la pan ne m ia ka Police Verification, namar ka jinghuri hura ha Bangladesh,bad ka Meghalaya ka dei ka transit bad ki lah ban rung na Bangladesh sha jylla jong ngi ,bad khamtam ha ki thain Border, bad nangne na Meghalaya ki poi sha Assam ,bad sha kiwei ki jylla jong ka Ri India,kane ka pynlong ia ka jingsngew syier bad shwa ban ai ia ki license dei ban phah shwa da ka Police Verification.
Shuh shuh u la ong ba ki khasi ki dei ban ioh ia ka license bad kiwei ki jaitbynriew lada ki la ngiah kin leit sha shnong lajong ban kamai kajih, bad ki khasi jong ngi ki hap shong beit hangne ha ri khasi bad kaba kongsan hap peit shwa ia ki briew lajong, namar kiwei ki jaitbynriew ki dang don ka lad ym kum ki khasi jong ngi kiba shong ba sah beit hangne ha jylla.
Khatduh u la ai khublei ia ka sorkar, ka Municipal ,kaba la plie lad na ka bynta jong kine kiba die madan ban shong ha ki dukan thymmai ha Muda Parking lot, bad haba ka ain ka don ka lynti ka don bad ngim lah ban ong bym don ia ka lad ka lynti ha man ki ain.
Ka sorkar ka la ai ia kane la lad shim ia kane ka lad bad ka sorkar ka khlem leh bein bad ka la ai ia ki jaka bad ki dukan na ka bynta kine kiba die madan.
