-Don kiba kmen, don kiba diaw hadien ba sdang ban die jingdie ha MUDA-
Hadien ba ka Shillong Municipal Board (SMB) ha ryngkat ka jingiatreilang jong ki bor pulit ka Jylla ki la kyndang lut ia kiba die madan ha ka thaiñ 9-Lad, la sakhi ba mynta ka sngi ka 24 Naitung 2025, ka lynti iaid kjat na 9-Lad ha Umsohsun ka la sdang ban kynjah bad ka lynti ruh ka la kham kylluid ban iaid.
Watla kata, dang don katto katne kiba dang ïaleh pyrshah ban phriang ia ki mar jong ki ha kitei ki jaka ba la mana. Ban tip tikna halor kane ka jingbteng jong katto katne kiba dang die jingdie ha lynti, na ka liang u Nonglum khubor jong ka Yutipnews u la ioh ban twad jingmut na kito kiba dang bteng ia ka kam jong ki wat hadien ba ka Sorkar ka la ai ia ka tarik ba khatduh, kata ha ka 22 tarik mynta u bnai. Haba kylli na katto katne kiba dang don ha kitei ki lynti, don kiba la iathuh ba ki la dep ban aplai ia ki Laisen (COV) jong ki, hynrei na ophis SMB ki iathuh ba kin sa wan biang ha kawei ka sngi bad katei ka la pynlong ia ki ban ap sah ia ka jubab namar na ka liang ka ophis ki la bthah ban iai ap. Don katto katne, kiba la ioh ia ki jaka lane ki nombor ba la pynkhalai nusib hynnin ka sngi ha MUDA, hynrei namar ba sheptieng ioh duna ka Ïew, kumta ki la bteng ban die jingdie ha kitei ki jaka ba ka Sorkar ka la maham pyrshah. Don pat katto katne kiba die soh, ki iathuh ba ka SMB ka la bthah ban ap shipor na ka bynta jong ki namar ki dang shna pynbiang na ka bynta ban pyntikna ba ki mar kin ym pyut lane lehnohei.
Haba ioh pat ban kylli na kito kiba la sdang ban sei ia ki mar jong ki ha ka jaka kaba thymmai, kata ha jaka ieng kali jong ka MUDA (parking lot) ha 9-Lad, don katto katne kiba kmen namar ka dei ka jaka kaba ym donkam jingsiew, nalor kata ki la iathuh ba ki la lait na u slap bad ka jingshit hynrei ki la kham kren diaw khyndiat namar ba ka jaka leit bar/pynjhih (toilet) bad ka um kam da biang bha nalor ki nongdie ki la bun. Don kiba kmen hynrei ki diaw bad sheptieng ioh ba ka Ïew kam iaid kumba long shabar ia kiba ki la ju shong mynshwa.
Ha kane ka sngi ruh, ka SMB ryngkat bad ki bor pulit ki dang bteng ban kyndang ia kito kiba ïaleh pyrshah ban sei ia ki mar jong ki hynrei ka jingkyndang ka long kaba jai jai.
